მთელი რუსეთი მალე საბჭოთა კავშირის ნაფტალინის სუნში აღმოჩნდება, - ამის შესახებ უკრაინის პრეზიდენტის აპარატის ხელმძღვანელი, ანდრეი ერმაკი წერს, რითაც ის ევროკავშირის მიერ რუსეთთან გამარტივებული სავიზო რეჟიმის შეჩერებას ეხმაურება.

ერმაკი განმარტავს, რომ ეს ჯერ კიდევ არ არის სრული სავიზო აკრძალვა, რაც მომავალში აუცილებელია, მაგრამ მაინც კარგი გადაწყვეტილებაა.

„რუსებო, გრძნობთ? ეს საბჭოთა კავშირის ნაფტალინის მყრალი სუნია, რომელშიც ასე გინდოდათ მოხვედრა. მალე მთელი თქვენი ქვეყანა იქ იქნება", - აღნიშნა მან.

შეგახსენებთ, ევროკავშირის საბჭომ დღეს დაამტკიცა გადაწყვეტილება რუსეთთან გამარტივებული სავიზო რეჟიმის სრულად შეჩერების შესახებ, რაც გამოიწვევს სავიზო განაცხადის საფასურის გაზრდას 35 ევროდან 80 ევრომდე, დამატებითი დოკუმენტური მტკიცებულებების წარდგენის საჭიროებას, ვიზის განხილვის დროის გაზრდას და მრავალჯერადი ვიზების გაცემის უფრო შემზღუდველ წესებს.