სახელმწიფო უსაფრთხოების სამსახურის ხელმძღვანელის, გრიგოლ ლილუაშვილის განცხადებით, ნებისმიერ ქმედებაზე, რომელიც მიმართული იქნება საბოტაჟის ან სახელმწიფოს ფუნქციონირების ხელშეშლისკენ, გამოძიება დაიწყება. ასე უპასუხა მან კითხვას, თუ რა ეტაპზეა სახელმწიფო გადატრიალების მუხლით დაწყებული გამოძიება.

როგორც სუს-ის უფროსმა განმარტა, საქმის ფიგურანტი პირები გამოიკითხნენ და შემდგომში განვითარებულმა მოვლენებმა დღის წესრიგიდან მოხსნა რაიმე რისკის და საფრთხის განვითარება ამ მიმართულებით.

„ჩვენს სამსახურს არ სჭირდება ფარული მიყურადების შედეგად მიღებული ფაქტობრივი გარემოებების დამატებით წარმოდგენა. კარგად ნახეთ, რა საუბრებთან, რა განზრახვებთან გვქონდა საქმე - საბოტაჟის მოწყობის მცდელობასთან, დესტრუქციასთან, სახელმწიფო უწყებების ფუნქციონირების ხელშეშლასთან, ეს და მსგავსი ტიპის ინფორმაცია მიღებისთანავე საჭიროებს რეალიზებას, რაშიც გამოძიების დაუყოვნებლივ დაწყება იგულისხმება. ბუნებაში არ არსებობს, რომ ყველა გამოძიება შედეგით დასრულდეს, ვინაიდან გარდა შედეგზე გასვლისა, გამოძიებას პრევენციული ხასიათი აქვს. ჩვენ მიერ დაუყოვნებლივ გამოიკითხა ამ საქმის ფიგურანტი პირები და შემდგომში განვითარებულმა მოვლენებმა დღის წესრიგიდან მოხსნა რაიმე რისკის და საფრთხის განვითარება ამ მიმართულებით. ასე რომ, გამოძიება დახურული არ არის. ამ ან ნებისმიერი სხვა პიროვნების მიერ ნებისმიერი ქმედება, რომელიც მიმართული იქნება საბოტაჟისკენ, სახელმწიფო ფუნქციონირების ხელშეშლისკენ, თან არ დაგავიწყდეთ, ეს პანდემიის პერიოდში ხდებოდა, აუცილებლად იქნება რეაგირებული გამოძიებით და შესაბამისი ოპერატიული-საგამოძიებო მოქმედებებით უზრუნველყოფილი“, - განაცხადა ლილუაშვილმა.

ინფორმაციისთვის, საქართველოს სახელმწიფო უსაფრთხოების სამსახურის სახელმწიფო უსაფრთხოების დეპარტამენტი სახელმწიფო ხელისუფლების დამხობის მიზნით შეთქმულების ფაქტზე გამოძიებას აწარმოებდა.