უკრაინის წინსვლის ფონზე, რუსეთმა, სავარაუდოდ, საკუთარი ჯარების ოკუპირებული ხარკოვის ოლქიდან გაყვანის ბრძანება გასცა, - ამის შესახებ გაერთიანებული სამეფოს თავდაცვის სამინისტროს ანგარიშშია აღნიშნული.

უწყების შეფასებით, სამხრეთში უკრაინული შორი მოქმედების არტილერია ახლა ისე ხშირად ურტყამს მდინარე დნეპროს გადასასვლელებს, რომ რუსეთს არ შეუძლია განახორციელოს მათი შეკეთება და ძალების მომარაგების უზრუნველყოფა.

„უკრაინის სწრაფ წარმატებებს მნიშვნელოვანი გავლენა აქვს რუსეთის საერთო ოპერაციულ გეგმაზე. უკრაინაში განლაგებული ძალების უმეტესი ნაწილი იძულებულია პრიორიტეტი საგანგებო თავდაცვით მოქმედებებს მიანიჭოს“, - აცხადებენ უწყებაში.

გაერთიანებული სამეფოს თავდაცვის სამინისტროში აცხადებენ, რომ არსებული ვითარების ფონზე რუსეთის სამხედრო ხელმძღვანელობის მიმართ ჯარისკაცების ნდობა კიდევ უფრო გაუარესდება.

„დისლოცირებული ჯარისკაცების ისედაც შემცირებული ნდობა რუსეთის სამხედრო ხელმძღვანელობის მიმართ, სავარაუდოდ, კიდევ უფრო გაუარესდება“, - აცხადებენ უწყებაში.