ლანდშაფტურ მეცნიერებას და ლანდშაფტურ დაგეგმარებას, კარტოგრაფიას და გეოგრაფიულ ინფორმაციულ სისტემებს (GIS), გარემოს მართვას 12 ქვეყნის 100-ზე მეტი მკვლევარი ივანე ჯავახიშვილის სახელობის თბილისის სახელმწიფო უნივერსიტეტში განიხილავს.
უნივერსიტეტის პრესსამსახურის ცნობით, საერთაშორისო კონფერენცია -„მდგრადი განვითარების ლანდშაფტური განზომილება: კვლევა, კარტო/გის, დაგეგმარება, მართვა“, გამოჩენილი ქართველი გეოგრაფისა და კარტოგრაფის, ექსპერიმენტატორისა და მოგზაურის, პროფესორ ნიკოლოზ (ნიკო) ბერუჩაშვილის დაბადებიდან 75 წლის იუბილეს ეძღვნება.
მათი ინფორმაციით, ღონისძიებას თსუ-ს რექტორი გიორგი შარვაშიძე, ქართველი და უცხოელი მეცნიერები ესწრებიან.
„ქართული გეოგრაფიული და კარტოგრაფიული მეცნიერების განვითარებასა და ნოვაციური იდეების დანერგვაში ნიკო ბერუჩაშვილის უდიდესი წვლილის დაფასებაა კონფერენცია, რომელიც თსუ-ში მიმდინარეობს. კონფერენციაზე ქართველი და უცხოელი მეცნიერები ამ სფეროში თანამედროვე კვლევებს განიხილავენ და ერთმანეთს უახლეს ინფორმაციას უზიარებენ. ასეთი ღონისძიება ხელს უწყობს თსუ-სა და მსოფლიოს სხვადასხვა უნივერსიტეტს შორის სამეცნიერო-პედაგოგიური კავშირების გაღრმავებას“,-განაცხადა თსუ-ს რექტორმა, გიორგი შარვაშიძემ.
ბრნოს (ჩეხეთი) უნივერსიტეტის პროფესორის, კარტოგრაფიის საერთაშორისო ასოციაციის ვიცე-პრეზიდენტის მილან კონეჩნის თქმით, ნიკო ბერუჩაშვილი დღემდე რჩება მსოფლიოში ერთ-ერთ საუკეთესო კარტოგრაფად.
„ბერუჩაშვილის სამეცნიერო ინიციატივები მნიშვნელოვანია და მოიცავს ლანდშაფტის უსაფრთხოების საკითხებს. კონფერენციაზე ეს თემები განიხილება გეოგრაფების, კარტოგრაფების აქტიური მონაწილეობით“,-აღნიშნა მილან კონეჩნიმ.
კონფერენციის ფარგლებში, თსუ-ს მუზეუმში ნიკო ბრუჩაშვილის ცხოვრებისა და მოღვაწეობის ამსახველი ფოტომასალის გამოფენა გაიხსნა.
„თსუ-ს პროფესორის თენგიზ გორდეზიანის ინფორმაციით, საერთაშორისო კონფერენციაზე გამოცხადდა, რომ საგურამო-იალნოს ქედის ერთ-ერთ მწვერვალს, რომლის სიმაღლე 1824 მეტრია, ნიკო ბერუჩაშვილის სახელი მიენიჭა.
თსუ-ს კარტოგრაფია-გეოდეზიისა და გეოინფორმატიკის კათედრის გამგის ნიკო ბერუჩაშვილის ინიციატივით, თსუ-ში 1979 წელს დაარსდა აეროკოსმოსური მეთოდებით ბუნებრივი გარემოს შემსწავლელი სამეცნიერო-კვლევითი ლაბორატორია, რომელიც ევრაზიის სხვადასხვა მთიან სისტემაში აწარმოებდა კვლევებს.
ნიკო ბერუჩაშვილი იყო მარტყოფის ფიზიკურ-გეოგრაფიული სტაციონარის სამეცნიერო ხელმძღვანელი. 2002 წელს ნიკო ბერუჩაშვილის ინიციატივით, საერთაშორისო გეოგრაფიულ კავშირში დაარსდა „ლანდშაფტური ანალიზის“ კომისია, რომლის პირველი თავმჯდომარეც თავად იყო. მის სახელს უკავშირდება ახალი მიმართულების - ბუნებრივ-ტერიტორიული კომპლექსების სივრცე - დროითი ანალიზისა და სინთეზის კონცეფციის შემუშავება ლანდშაფტმცოდნეობაში. ნიკო ბერუჩაშვილი კითხულობდა ლექციებს სანქტ-პეტერბურგის, ტულუზის, სორბონის და სხვა უნივერსიტეტებში“,-აღნიშნულია ინფორმაციაში.