რომეო მიქაუტაძე - მაღალტექნოლოგიური დერეფნების სრულყოფილი ფუნქციონირება ენერგეტიკის განვითარების გარეშე წარმოუდგენელია

„მაღალტექნოლოგიური დერეფნების სრულყოფილი ფუნქციონირება ენერგეტიკის განვითარების გარეშე წარმოუდგენელია. ახალ ტექნოლოგიებს სჭირდება დამატებითი ელექტროენერგია და მდგრადი გადამცემი ინფრასტრუქტურა. ელექტროენერგიის გენერაცია და გადაცემა ნებისმიერ ქვეყნის ეკონომიკის ძირითადი არტერიაა და ტრანსპორტისა და კომუნიკაციის სისტემებთან ერთად, მის ეფექტიანობას განსაზღვრავს“, - ამის შესახებ ეკონომიკისა და მდგრადი განვითარების მინისტრის მოადგილე რომეო მიქაუტაძემ საერთაშორისო ციფრული კავშირის სამიტზე სიტყვით გამოსვლისას განაცხადა.

აღნიშნულ ინფორმაციას ეკონომიკისა და მდგრადი განვითარების სამინისტრო ავრცელებს.

მინისტრის მოადგილემ აღნიშნა, რომ ენერგეტიკული სისტემის უსაფრთხოება და სტაბილურობა დამოკიდებულია სტაბილური მიწოდების უზრუნველყოფაზე და ენერგეტიკული წყაროების დივერსიფიცირებასა და გადაცემის საიმედოობაზე.

მისივე თქმით, ენერგეტიკული პოლიტიკის გამტარებლების მთავარი გამოწვევაა პროცესის მართვა ისე, რომ მაქსიმალურად გაზარდოს სარგებელი ენერგეტიკული სისტემისთვის და მინიმუმამდე დაიყვანოს უარყოფითი ზემოქმედება.

რომეო მიქაუტაძის განცხადებით, საქართველოში ყოველწლიურად იზრდება როგორც ელექტროენერგიაზე მოთხოვნა, ისე ახალი გენერაციის ობიექტებზე მოთხოვნა.

„ბოლო ათწლეულის განმავლობაში საქართველოს ენერგოსისტემას შეემატა მთელი რიგი ახალი ობიექტებისა. მათ შორის, 55 ჰიდროელექტროსადგური, 2 თბოელექტროსადგური, რომლებიც გაცილებით უფრო ეფექტურია, ვიდრე მანამდე არსებულები და ერთი ქარის ელექტროსადგური. 2022 წლის განმავლობაში ინვესტორებთან გავაფორმეთ 61 ხელშეკრულება, რაც ქვეყანაში 704 მლნ. აშშ დოლარამდე ინვესტიციას გულისხმობს და პოტენციურად 1,6 მილიარდ კვტ სთ-ს შემატებს წლიურად ადგილობრივ გენერაციას. საქართველოში პირველი ნაბიჯები იდგმება „მწვანე“ წყალბადის წარმოების განვითარების მიმართულებით. ასევე იზრდება დაინტერესება მზის და ქარის ენერგეტიკით“, - განაცხადა მიქაუტაძემ.

მინისტრის მოადგილემ სამიტის მონაწილეების ყურადღება გაამახვილა შავი ზღვის წყალქვეშა გადამცემი ხაზის პროექტზე, რაც არის ელექტრო და ოპტიკურ-ბოჭკოვანი კაბელი, რომელიც დააკავშირებს საქართველოსა და რუმინეთს.

„როგორც წინასწარმა ეკონომიკურმა ანალიზმა აჩვენა, პროექტი სიცოცხლისუნარიანია და მნიშვნელოვან ეკონომიკურ სარგებელს მოუტანს არა მართო საქართველოს, არამედ სამხრეთ კავკასიის ქვეყნებს, რუმინეთს და სამხრეთ - აღმოსავლეთ ევროპის სახელმწიფოებს. ისინი შეძლებენ, ისარგებლონ ექსპორტის გაფართოებული შესაძლებლობებით, ხოლო ზამთრის პერიოდში განახორციელონ იმპორტი კონკურენტული ფასებით, რაც ძვირადღირებულ იმპორტსა და თბოგენერაციაზე დამოკიდებულებას შეამცირებს. ოპტიკურ-ბოჭკოვანი კაბელი, რომელიც პროექტის ნაწილი იქნება, საშუალებას მისცემს გაიზარდოს ფართოზოლოვანი მონაცემთა ტრაფიკი. ასევე, ხელს შეუწყობს საინფორმაციო ტექნოლოგიების ინდუსტრიის შემდგომ განვითარებას“, - განაცხადა მინისტრის მოადგილემ.

ეკონომიკისა და მდგრადი განვითარების სამინისტროს ცნობით, თბილისის სამიტში მონაწილეობა მიიღეს ევროპის, ცენტრალური აზიის, ჩინეთის და კავკასიის რეგიონის ქვეყნების წარმომადგენლებმა. ღონისძიება ეკონომიკისა და მდგრადი განვითარების სამინისტროს, კომუნიკაციების კომისიისა და მსოფლიო ბანკის ორგანიზებით ჩატარდა.

მირიან მირიანაშვილი - თუ დასავლეთმა სალომე ზურაბიშვილის პროექტი არ დაქოქა, პრობლემები ხელისუფლებას შეიძლება დაეწყოს არა არჩევნებამდე, არამედ არჩევნების შემდეგ
ოჯახური ძალადობა, სამუშაო ადგილებზე სექსუალური ხასიათის არასასურველი ქცევა, პოლიციის მხრიდან ძალის გადამეტება და ბავშვთა უფლებების დარღვევა - რა შინაარსის ზარები ხორციელდება სახალხო დამცველის „ცხელ ხაზზე“
„პერსონალურ მონაცემთა დაცვის შესახებ“ ახალი კანონი ამოქმედდა - რა სიახლეები შემოდის პერსონალურ მონაცემთა დაცვის სფეროში?
ქართული პრესის მიმოხილვა 29.02.2024
„ფარმადეპოში“ გაზაფხულის ფასდაკლებები დაიწყო
კახა ოქრიაშვილი - აზარაშვილის გადაყენება არასაკმარისია - არამხოლოდ მე, არამედ მთელი ჯანდაცვა ვითხოვთ მისი დანაშაულებრივი ქმედებების სიღრმისეულ გამოძიებას!