სომხეთის პრემიერ-მინისტრმა, ნიკოლ ფაშინიანმა და აშშ-ის კონგრესის წარმომადგენელთა პალატის სპიკერმა ნენსი პელოსიმ სომხეთსა და აშშ-ს შორის ორმხრივი ურთიერთობების დღის წესრიგი და რეგიონში მიმდინარე პროცესები განიხილეს, - ინფორმაციას სომხური მედია პრემიერის ოფისზე დაყრდნობით ავრცელებს.
მათივე ინფორმაციით, პელოსიმ ხაზი გაუსვა, რომ სომხეთში მყოფი აშშ-ის დელეგაციის წევრები სომხეთის მეგობრები და მხარდამჭერები არიან.
„სომხეთის დემოკრატიის მხარდაჭერა, სომეხთა გენოციდის აღიარების რეზოლუცია, თურქეთთან დაპირისპირება მთიანი ყარაბაღის საკითხთან დაკავშირებით და ყველა სხვა თვალსაზრისით, ჩვენ სომხეთის მეგობრები ვართ“, - აღნიშნა პელოსიმ.
თავის მხრივ, სომხეთის პრემიერმა აშშ-ის წარმომადგენელთა პალატის სპიკერს ვიზიტისთვის და სომხეთის მიმართ მხარდაჭერის გამოხატვისთვის მადლობა გადაუხადა.