უახლოეს მომავალში უკრაინის ფრონტზე ესკალაციას უნდა ველოდოთ, - ამის შესახებ უკრაინის ეროვნული უშიშროების და თავდაცვის საბჭოს მდივანმა ოლექსი დანილოვმა განაცხადა.

მისი თქმით, ფრონტზე ესკალაცია მოხდება იმის გამო, რომ რუსეთმა მობილიზაცია გამოაცხადა და ოკუპანტები შეეცდებიან გარკვეული ნაბიჯების გადადგმას.

ამასთან, დანილოვი ირწმუნება, რომ უკრაინის შეიარაღებული ძალები მზად არიან მოვლენების ნებისმიერი განვითარებისთვის.

„რუსეთი შეეცდება მაქსიმალური ზიანი მოგვაყენოს, მაგრამ ჩვენ ასევე გვჯერა ჩვენი შეიარაღებული ძალების, გვესმის, რა ხდება ფრონტზე. მადლობელი ვართ ყველასი, ვინც წინ მიიწევს ხარკოვისა და ლუგანსკის მიმართულებით. ჩვენ მადლობელი ვართ მათი, ვინც დონეცკის მიმართულებას იცავს და ასევე სხვების. გვესმის, რა ხდება ფრონტზე. ჩვენი ჯარები მზად არიან მოვლენების ნებისმიერი განვითარებისთვის. მიგვაჩნია, რომ უახლოეს მომავალში იქნება რუსეთის ფედერაციის მხრიდან ესკალაციის მცდელობა, რადგან მათთან მობილიზაცია მიმდინარეობს“, - განაცხადა დანილოვმა.