„გირჩი-მეტი თავისუფლების“ ლიდერის, ზურაბ ჯაფარიძის განცხადებით, ევროპაში არავის აქვს იმის ილუზია, რომ „ქართული ოცნებიდან“ ვიღაცები მიდიან და „ხალხის ძალა“ დამოუკიდებელი პოლიტიკური ორგანიზმია. ამის შესახებ მან ბრიფინგზე განაცხადა, სადაც 19-21 ოქტომბერს ბრიუსელში გამართულ შეხვედრებთან დაკავშირებით ისაუბრა.

„რაც შეეხება დასავლეთის წინააღმდეგ მიმართულ პროპაგანდას - ერთ-ერთი მნიშვნელოვანი რამ, რაც გვითხრეს არის ის, რომ მათ საქართველოს ხელისუფლებასთან კომუნიკაცია არაერთხელ ჰქონდათ და უთხრეს, რომ ეს არის მტკნარი ტყუილი და არ შეიძლება პარტნიორი ქვეყანა ევროკავშირთან მიმართებაში ასე იქცეოდეს, მაგრამ თქვეს, რომ ისინი მაინც აგრძელებენ იმის კეთებას, რასაც აკეთებდნენ. მათ შორის, არანაირი ილუზია, იმასთან დაკავშირებით, რომ „ქართული ოცნებიდან“ ვიღაცები მიდიან და ეს „ხალხის ძალა“ არის დამოუკიდებელი პოლიტიკური ორგანიზმი, ევროპაში არავის არ აქვს“, - განაცხადა ზურაბ ჯაფარიძემ.

შეგახსენებთ, 19-21 ოქტომბერს ბრიუსელში გიორგი ვაშაძის და ზურაბ ჯაფარიძის ვიზიტი გაიმართა.