რუსეთის პრეზიდენტი ვლადიმერ პუტინი გაეროს და გაეროს უშიშროების საბჭოს სტრუქტურის ცვლილებას ითხოვს და აცხადებს, რომ ის უნდა ასახავდეს მსოფლიოს მრავალფეროვნებას.

„ამ მხრივ, შესაძლოა ღირდეს დაფიქრება, რომ გაერთიანებული ერების ორგანიზაციის სტრუქტურა, უშიშროების საბჭოს ჩათვლით, უფრო მეტად ასახავდეს მსოფლიოს რეგიონების მრავალფეროვნებას, რადგან ბევრად მეტი იქნება დამოკიდებული აზიაზე, აფრიკაზე, ლათინურ ამერიკაზე“, - განაცხადა პუტინმა.

მანვე ევროპის შესახებ ისაუბრა და განაცხადა, რომ დიდი ევრაზიის ერთ-ერთი ნაწილი შესაძლოა გამხდარიყო მისი დასავლური ნაწილი - ევროპა, მაგრამ მის ბევრ ლიდერს ხელს უშლის რწმენა, რომ ევროპელები სხვებზე უკეთესები არიან.

„ბუნებრივია, მისი დასავლური ნაწილი, ევროპა, ასევე შეიძლება იყოს დიდი ევრაზიის ნაწილი, მაგრამ მის ბევრ ლიდერს ხელს უშლის რწმენა, რომ ევროპელები სხვებზე უკეთესები არიან. რომ მათ არ შეშვენით მიიღონ მონაწილეობა ნებისმიერ წამოწყებაში თანაბარ პირობებში“, - განაცხადა პუტინმა საერთაშორისო სადისკუსიო კლუბ „ვალდაის“ პლენარულ სხდომაზე.

მან ხაზგასმით აღნიშნა, რომ დასავლური ცივილიზაცია არ არის ერთადერთი ევრაზიულ სივრცეში.

„უფრო მეტიც, მოსახლეობის უმრავლესობა კონცენტრირებულია ევრაზიის აღმოსავლეთში, სადაც წარმოიშვა კაცობრიობის უძველესი ცივილიზაციების ცენტრები. ევრაზიის ღირებულება და მნიშვნელობა ის არის, რომ ეს კონტინენტი არის თვითკმარი კომპლექსი ნებისმიერი სახის გიგანტური რესურსებით და უზარმაზარი შესაძლებლობებით“, - განაცხადა პუტინმა.

მისივე თქმით, რაც უფრო მეტად იმუშავებენ ქვეყნები ევრაზიის კავშირის გასაზრდელად და თანამშრომლობის ახალი გზებისა და ფორმების შექმნაზე, მით უფრო შთამბეჭდავი წარმატება იქნება მიღწეული.