ნუგზარ წიკლაური - მცირე პარტიები ცდილობენ „ნაციონალური მოძრაობის“ ორგანიზმის ნაწილი გახდნენ, რათა წარმატებას მიაღწიონ - ერთობის ინიციატივა გულისხმობს პარტიების გაუქმებას, ახლა კი პარტიების გაუქმების დრო არ არის

განუხორციელებელი იდეაა, რეალურად ლაპარაკია იმაზე, რომ ერთობის სახელით, ერთობის ხათრით გავერთიანდეთ, რომ „ნაციონალურ მოძრაობასთან“ ერთად სხვადასხვა პოლიტიკური პარტიის პოლიტიკური ვნებები იქნას დაკმაყოფილებული , - ამის შესახებ „ნაციონალური მოძრაობის“ ერთ-ერთმა ლიდერმა, ნუგზარ წიკლაურმა „პალიტრანიუსის“ გადაცემა „პოლიტიკურ სივრცეში“ გაერთიანების შესახებ „სტრატეგია აღმაშენებლის“, „დროასა“ და „გირჩი-მეტი თავისუფლების“ იდეაზე საუბრისას განაცხადა.

წიკლაურის თქმით, „ნაციონალური მოძრაობა“ დიდი პარტიაა და პატარა პარტიები ცდილობენ, გახდნენ მისი ორგანიზმის ნაწილი.

„ყველასათვის ცხადია სურათი - „ერთიანი ნაციონალური მოძრაობა“ ახლა არის დიდი პოლიტიკური პარტია, რომელსაც აქვს დიდი მხარდაჭერა და მცირე პარტიათა ნაწილი ცდილობს, გახდეს ამ ორგანიზმის ნაწილი, რათა შეძლოს თავიანთი მომავალი პოლიტიკური წარმატების მიღწევა“, - განაცხადა ნუგზარ წიკლაურმა და შეკითხვაზე, მისი განცხადების გათვალისწინებით, ფიქრობს თუ არა, რომ „სტრატეგია აღმაშენებლის“ ლიდერს, გიორგი ვაშაძესაც სურს „ნაციონალური მოძრაობის“ სახელის გამოყენება, რათა პოლიტიკურ წარმატებას მიაღწიოს, ნუგზარ წიკლაურმა აღნიშნა: „დიახ, მე მგონია, რომ მცირე პოლიტიკური პარტიები ახლა ეძებენ თავიანთ პოლიტიკურ მომავალს“.

ასევე, ნუგზარ წიკლაურის შეფასებით, გაერთიანების შესახებ გაჟღერებული იდეა, ჩამოუყალიბებელი, შინაარსს მოკლებული და „ამორფულია“.

„თვითონ ამ ინიციატივაზე უნდა გითხრათ, რომ არის ჩამოუყალიბებელიც, შინაარსს მოკლებულიც და ამორფულიც, თავისი ფორმით. ჯერ ერთი, არ იყო საკმარისი კონსულტაციები იმისათვის, რომ ასეთი ინიციატივა საჯაროდ გაჟღერებულიყო. მე მესმოდა მეგობრების მხრიდან საუბრები, რომ ჰქონდათ კომუნიკაცია „ნაციონალურ მოძრაობასთან“, სინამდვილეში ეს იყო ორი შეხვედრა. ერთი ნიკა მელიასთან, ფრაგმენტული საუბარი, სრულიად სხვა თემაზე შეკრებილები და მეორე, ერთ-ერთმა ჩემთან ისაუბრა ნიკა გვარამიას სასამართლოში, მცირე ხნით. ეს არის ის ფორმა, რომელიც მათ აირჩიეს და უცნაური იყო.

თუ ვლაპარაკობთ ერთობაზე, მაშინ ლაპარაკი უნდა იყოს სრულ გაერთიანებაზე, ბევრი პოლიტიკური პარტიის, რომელთა ევროპულ მისწრაფებებში არავის ეპარება ეჭვი. ამ პოლიტიკური ინიციატივის [შესაძლო გაერთიანების] ავტორებმა რატომღაც გადაწყვიტეს, რომ შემოფარგლული იყოს წრე. მეორეც, პირდაპირ რომ ვთქვათ, ეს ინიციატივა გულისხმობს პოლიტიკური პარტიების გაუქმებას იმიტომ, რომ ბლოკები აღარ არსებობს და უნდა გაუქმდეს ყველა პარტია, უნდა აიღოს ახალი ნომერი ამ გაერთიანებამ, ანუ პოლიტიკურ ისტორიაზე უარი უნდა თქვან პარტიებმა, რაც იქნება ურთულესად გადასადგმელი ნაბიჯი.

შესანიშნავი სიტყვაა ერთობა, მაგრამ ერთობას არ აქვს თავისთავადი ღირებულება. ერთობა მაშინ არის მნიშვნელოვანი, როდესაც ბევრი გარემოებებით პარტიები არიან დაკავშირებული, ადამიანები არიან დაკავშირებული და სწორედ ამ ერთობითაა წარმატების მიღწევა შესაძლებელი. მე არ ვფიქრობ, რომ ახლა პარტიების გაუქმების დროა და არ ვფიქრობ, რომ იმიტომ მივდიოდით ევროპული დემოკრატიისკენ მრავალფეროვნებისკენ, რომ ერთ მშვენიერ დღეს ვთქვათ, არა, უნიფიკაცია არის ახლა მთავარი“, - განაცხადა ნუგზარ წიკლაურმა.

ნუგზარ წიკლაურმა გადაცემაში პოლიტიკური პარტიების მიერ პარლამენტის დატოვების საკითხზეც ისაუბრა.

როგორც მან განაცხადა, აღნიშნული გადაწყვეტილება უნდა იქნას მიღებული, თუმცა გადაწყვეტილების მისაღებად შესაბამისი დროა საჭირო.

„პოლიტიკურმა პარტიებმა გადადგეს ნაბიჯი, ისინი შევიდნენ პარლამენტში და პრაქტიკულად აღმოჩნდა, რომ „ნაციონალური მოძრაობა“ რჩებოდა სრულად იზოლირებული ყველანაირი პოლიტიკური პროცესიდან და მაშინ იქნა მიღებული ეს [პარლამენტში შესვლის] გადაწყვეტილება. ამ გადაწყვეტილებასაც სიმართლე გითხრათ, მე არ ვეთანხმებოდი და ვფიქრობდი, რომ „ნაციონალური მოძრაობას“ უნდა შეენარჩუნებინა ის პოზიცია, რაც ჰქონდა. ძალიან დიდი მნიშვნელობა აქვს იმას, რომ ჩვენ საზოგადოებას გავაგებინოთ, ეს ხელისუფლება არ ფლობს ლეგიტიმაციას.

რაც შეეხება ახლა, ამ პოლიტიკურ ეტაპზე, მე მიმაჩნია, რომ გადაწყვეტილება უნდა იყოს მიღებული, მაგრამ ამ გადაწყვეტილებისთვის არის შესაბამისი დრო საჭირო. ერთია, როდესაც შევედით პარლამენტში და მეორეა კონკრეტული პოლიტიკური დრო, როდესაც შესაძლოა გახმოვანდეს სხვადასხვა ტიპის გადაწყვეტილებები. ისინი არ ასრულებენ 12 პუნქტს, პირდაპირ მიდიან ევროპის წინააღმდეგ და სულ რამდენიმე თვეში გახდება ევროპული საზოგადოების პოზიცია ცნობილი ამასთან დაკავშირებით და მე ვფიქრობ, მნიშვნელოვან წილად ჩვენი გადაწყვეტილების, შესაძლებელია თუ არა ამ პარლამენტში კვლავ დარჩენა, განმაპირობებელი იქნება.

არ შეწყვეტილა ამაზე არასოდეს საუბარი, ეს არის აქტუალური თემა და ყოველთვის მიმდინარეობს საუბარი. ახლა ერთადერთი რაზეც ვართ შეთანხმებულები არის ის, რომ ნებისმიერ გადაწყვეტილებას სჭირდება მკაფიო პოლიტიკური მომენტი, როდესაც ის სასარგებლო იქნება ქვეყნისთვისაც და იმ პოლიტიკური ძალისთვისაც, რომელიც დგამს ამ ნაბიჯს“, - განაცხადა ნუგზარ წიკლაურმა.

ნატა საბანაძე -  ჩვენი კანონი იმიტომაა „რუსული“, რომ ის ებრძვის დასავლეთს და მის მხარდაჭერას, მისი სამიზნე დასავლეთია, „ქართული ოცნება“, რუსეთის მსგავსად აღიარებს, რომ დასავლეთი მისი მტერია
ლევან დოლიძე - იმ ნაბიჯებზე ფოკუსირების ნაცვლად, რამაც უკვე შემდგომი პროგრესი უნდა მოგვიტანოს, ჩვენ თავად ვქმნით ახალ ბარიერებს ევროკავშირისკენ მიმავალ გზაზე
ქართული პრესის მიმოხილვა 15.04.2024
წინანდლის მამულში საგაზაფხულო სეზონი კულტურული ღონისძიებებით გაიხსნა