იმ ბარბაროსობის, იმ საშინელების ფონზე, რასაც რუსეთის ფედერაცია უკრაინაში სჩადის, ძალიან სავალალოა, თუ როგორ იქცევიან საქართველოს ხელისუფლების წარმომადგენლები,- ამის შესახებ პლონეთის სეიმის ვიცე-სპიკერმა მალგოჟატა გოშევსკამ ჟურნალისტებთან განაცხადა.

მისი თქმით, ამ ფაქტის მიუხედავად ის სიამაყით ადევნებს თვალს ქართველი ხალხის სოლიდარობას უკრაინის მიმართ, რომელიც მორიგ ჯერზე ამტკიცებს, რომ დასავლური საზოგადოების ნაწილია.

„მე ძალიან დიდი სევდით ვადევნებ თვალყურს იმას თუ რა ხდება ახლა საქართველოში, როგორ პირობებში უწევთ ქართველებს ყოფნა და რა მდგომარეობაშია დემოკრატია ამჟამად ქვეყანაში. განსაკუთრებით ამას დიდი მნიშვნელობა აქვს ახლა, როცა გრძელდება საშინელი ომი უკრაინაში, რომელიც რუსეთის ფედერაციამ წამოიწყო და იმ ბარბაროსობის, იმ საშინელების ფონზე, რასაც სჩადის რუსეთის ფედერაცია უკრაინაში, ძალიან სავალალოა თუ როგორ იქცევიან საქართველოს ხელისუფლების წარმომადგენლები. მაგრამ დიდი სიამაყით ვადევნებ თვალყურს იმას თუ როგორ იქცევა ქართული საზოგადოება, როგორ იქცევიან ქართველები, როგორ ეხმარებიან უკრაინელ ლტოლვილებს სხვადასხვა ფორმით და მათ შორის, უშუალოდ როგორ იბრძვიან ქართველები უკრაინაში. ქართული საზოგადოება მორიგ ჯერზე ამტკიცებს, რომ ის ყოველთვის დასავლური საზოგადოების ნაწილია და იქნება ამ საზოგადოების ნაწილი ყოველთვის. ძალიან დიდი სურვილი მაქვს, რომ პოლიტიკურმა ხელისუფლებამაც გაითავისოს ეს. მოუსმინოს თავის საზოგადოებას და მოუსმინოს იმ ხალხს, რომელსაც მართავს“,- განაცხადა გოშევსკამ.