ჩრდილოეთ კორეა რუსეთთან იარაღის მიწოდებასთან დაკავშირებით რაიმე გარიგებას უარყოფს და აცხადებს, რომ ამის გაკეთებას არ აპირებს, - ინფორმაციას ჩრდილოეთ კორეის სახელმწიფო მედია ავრცელებს.

კომენტარი მას შემდეგ გაკეთდა, რაც შეერთებულმა შტატებმა განაცხადა, რომ ფხენიანი, როგორც ჩანს, რუსეთს უკრაინაში ომისთვის საარტილერიო ჭურვებს აწვდის.

„ჩვენ განვიხილავთ აშშ-ის ასეთ ნაბიჯებს, როგორც მის მტრულ მცდელობას, შელახოს ჩრდილოეთ კორეის იმიჯი საერთაშორისო ასპარეზზე“, - განაცხადა ჩრდილოეთ კორეის ხელისუფლების წარმომადგენელმა.

თეთრი სახლის მრჩეველმა ეროვნული უსაფრთხოების საკითხებში ჯონ კირბიმ გასულ კვირას განაცხადა, რომ შეერთებულ შტატებს აქვს ინფორმაცია, რომელიც მიუთითებს იმაზე, რომ ჩრდილოეთ კორეა ფარულად აწვდის რუსეთს საარტილერიო ჭურვების "მნიშვნელოვან" რაოდენობას.