საგარეო საქმეთა მინისტრი ილია დარჩიაშვილი 18 ნოემბრის პლენარულ სხდომაში მონაწილეობას არ მიიღებს.
როგორც ბიუროს სხდომაზე ითქვა, მიზეზი მინისტრის ჯანმრთელობის მდგომარეობაა, რის გამოც მას პარლამენტში მოსვლა არ შეუძლია.
ილია დარჩიაშვილი პარლამენტში ინტერპელაციის წესით ოპოზიციამ დაიბარა. მას საინტერპელაციო კითხვებზე პასუხი ჯერ კიდევ სექტემბერში უნდა გაეცა, თუმცა მაშინ მინისტრის ამ ფორმატში მოსმენა აშშ-ში მისი ვიზიტის გამო გადაიდო.
დარჩიაშვილისთვის გაგზავნილი კითხვები შეეხებოდა რუსეთის ოკუპაციას, ბიჭვინთის ანექსიის პროცესს და ამ საკითხთან დაკავშირებით უწყების დუმილს, ასევე სოხუმის აეროპორტის აღდგენასთან და მის რუსეთისთვის შესაძლო გადაცემასთან დაკავშირებულ თემას. კითხვები შეეხებოდა საქართველოს საგარეო პოლიტიკის მნიშვნელოვან საკითხებს.
საინტერპელაციო კითხვებს ხელს აწერენ: - თეონა აქუბარდია, ტარიელ ნაკაიძე, ანა ნაცვლიშვილი, გიორგი ვაშაძე, პაატა მანჯგალაძე, ხათუნა სამნიძე და დავით ბაქრაძე.