საპარლამენტო უმრავლესობის დეპუტატის, დავით მათიკაშვილის განცხადებით, დეოლიგარქიზაციის კანონპროექტი, რომელიც პარლამენტში ფრაქცია „ნაციონალურმა მოძრაობამ“ წარადგინა, ანტიკონსტიტუციურია და კრიტიკას ვერ უძლებს.

როგორც მან „პალიტრანიუსის“ გადაცემა „360 გრადუსში“ საუბრისას განაცხადა, აშკარად ჩანს, რომ დოკუმენტი დავით კეზერაშვილის გადასარჩენად არის „შეთხზული“.

„რაღაც „სასწაული“ იხილა საზოგადოებამ, როგორც პოლიტიკურად ასევე, სამართლებრივად აბსურდში მყოფი დოკუმენტი, რომელიც „ნაციონალურმა მოძრაობამ“ წარმოადგინა. ვერანაირ კრიტიკას ის ვერც სამართლებრივად და ვერც იურიდიულად ვერ უძლებს. არის ანტიკონსტიტუციური. წერია ისეთი კვორუმები, რომელიც ბუნებაში არ არსებობს. აშკარად ყველაფერი მეტყველებს იმაზე, რომ დავით კეზერაშვილის გადასარჩენად არის ეს დოკუმენტი დაწერილი, თავიდან ბოლომდე შეთხზული“, - განაცხადა საპარლამენტო უმრავლესობის დეპუტატმა.

მისივე შეფასებით, „ნაციონალური მოძრაობა“ „ჭაობში მყოფი პარტიაა“ და 2024 წლისთვის კიდევ კარგად გამოჩნდება ამ პარტიისგან, როგორც პოლიტიკური ძალისგან, საერთოდ რამე თუ დარჩება.

„ჭაობში მყოფი პარტიაა, რომელიც ოლიგარქ კეზერაშვილის ფულზე დგას და მთელი ეს შიდაპარტიული დაპირისპირებები და ცემა-ტყეპები არის იქითკენ მიმართული, რომ რომელი შეძლებს და ამ თანხებს - ჯარის გაქურდვით მიღებულ ფულად სახსრებს და ძალიან მაღალი ალბათობით, გერმანელი პენსიონერების გაქურდვითაც მიღებულ სახსრებს, დაეუფლება. ამაზე არის მთელი ამბავი „ნაციონალურ მოძრაობაში“.

ხომ ღირსია „ნაცმოძრაობა“, რომ ხაბეიშვილი აირჩიონ თავმჯდომარედ?! ეს პარტია ამბობს, რომ ჩვენ ვართ ნომერ პირველი ოპოზიციური პარტია საქართველოშიო და უნდა დავწყვიტო „ნაცმოძრაობას“გული და ვთქვა, რომ ასე ნამდვილად აღარ იქნება ამ ყველაფრიდან გამომდინარე. უკვე ალბათ, აღარ არის. 2024 წლისთვის კიდევ კარგად გამოჩნდება ამ პარტიისგან საერთოდ რამე თუ დარჩება, როგორც პოლიტიკური ძალისგან, კარგად გამოჩნდება რას წარმოადგენს ეს პარტია“, - განაცხადა დავით მათიკაშვილმა.

რაც შეეხება საქართველოს ყოფილი პრეზიდენტის, მიხეილ სააკაშვილის საკითხს - როგორც უმრავლესობის დეპუტატი აცხადებს, სააკაშვილის შეწყალება პრეზიდენტის გადასაწყვეტია, თუმცა ცალკე საკითხია, რამდენად სწორი, ან არასწორი იქნება.

მისივე თქმით, მიხეილ სააკაშვილის ჯანმრთელობის მდგომარეობას ექიმები აფასებენ და პატიმრის ქვეყნიდან გაყვანა არცერთ კანონში არ წერია.

ამასთან, მათიკაშვილის შეფასებით, მიხეილ სააკაშვილის შესაძლო მოწამვლის საკითხი „ჩაიფუშა“.

„ვერავინ ვერ იტყვის იმას, პრეზიდენტი რას გამოიყენებს და რას არა. ვერც მე, ვერც თქვენ, ვერც BBC-ი და ვერც სააკაშვილი. ეს პრეზიდენტის დისკრეციაა. მეორეა ეს რამდენად სწორი იქნება, ან არ იქნება - ამის შეფასება ჩვენ შეგვიძლია გავაკეთოთ, მაგრამ ეს მისი გადასაწყვეტია. არსებობს გარკვეული კრიტერიუმები, რომლითაც ფასდება. „არა და არასდროს“ არც ჩემი ნათქვამია და არც თქვენი, ეს პრეზიდენტმა ბრძანა.

ჯანმრთელობის მდგომარეობას ექიმები აფასებენ. ექიმების დასკვნის შესაბამისად დგება აბსოლუტურად ყველაფერი და პატიმრის ქვეყნიდან გაყვანა არცერთ კანონში, არცერთ კოდექსში არ წერია“, - განაცხადა მათიკაშვილმა.