ნატო-ს ქვეყნებმა, რომლებსაც საერთო საზღვრები აქვთ უკრაინასთან, უნდა იფიქრონ საჰაერო თავდაცვის გაძლიერებაზე, რათა დაიცვან თავიანთი ტერიტორიები, - ამის შესახებ ლატვიის საგარეო საქმეთა მინისტრმა, ედგარს რინკევიჩსმა განაცხადა.

მისი თქმით, პოლონეთის ტერიტორიაზე რაკეტის ჩამოვარდნის ინციდენტი ადასტურებს უკრაინის მოსაზღვრე ნატო-ს ქვეყნებისთვის საჰაერო თავდაცვის დამატებითი სისტემების შეძენის აუცილებლობას. ამასთან, ლატვიის საგარეო უწყების ხელმძღვანელმა ხაზგასმით აღნიშნა, რომ მსგავსი ინციდენტები მხოლოდ რუსეთის შეიარაღებული აგრესიის და უკრაინის დაბომბვის გამო გახდა შესაძლებელი.

მისი თქმით, ლატვია აძლიერებს საჰაერო თავდაცვას. მთავრობის დეკლარაციის პროექტში საჰაერო თავდაცვის გაძლიერების საკითხი დაისვა და ამისთვის დამატებითი თანხები გამოიყო.