მიუნხენის უსაფრთხოების კონფერენციის ხელმძღვანელი და გაერო-ში გერმანიის ყოფილი ელჩი, კრისტოფ ჰოისგენი აცხადებს, რომ რუსეთის ხელისუფლების წარმომადგენლები მომავალ წელს დაგეგმილ მიუნხენის უსაფრთხოების კონფერენციაზე არ მიუწვევიათ.

„რუსი ოფიციალური პირები მიუნხენის უსაფრთხოების კონფერენციაზე მიწვეულები არ არიან. არ მივცემთ ტრიბუნას თავიანთი პროპაგანდისთვის“, - წერს კრისტოფ ჰოისგენი „ტვიტერზე“.

მისი თქმით, რუსეთის მომავლის განხილვა ოპოზიციის ლიდერებთან და განდევნილ ადამიანებთან უნდა მოხდეს.

„გვსურს, რუსეთის მომავალი რუსეთის ოპოზიციის ლიდერებთან და განდევნილ ადამიანებთან განვიხილოთ. მათ ხმას მოსმენა და გაძლიერება სჭირდება“, - წერს გერმანელი დიპლომატი.

მიუნხენის უსაფრთხოების 59-ე კონფერენცია 2023 წლის 17-19 თებერვალს გაიმართება.