ევროპარლამენტის ოფიციალურ ვებგვერდზე კიბერშეტევა განხორციელდა. ეს მას შემდეგ მოხდა, რაც ევროპარლამენტმა მხარი დაუჭირა რეზოლუციას, რომლითაც რუსეთი „ტერორიზმის სპონსორ სახელმწიფოდ“ ცნო.
„ევროპარლამენტის გუნდი მუშაობს ამ პრობლემის რაც შეიძლება სწრაფად გადაჭრისთვის", - ამის შესახებ ევროპარლამენტის წარმომადგენლმა Twitter-ზე განაცხადა.
„ტვიტერის“ საკუთარ გვერდზე ფაქტს გამოეხმაურა ევროპარლამენტის პრეზიდენტი რობერტა მეცოლა და განაცხადა, რომ ევროპარლამენტის ვებგვერდმა განიცადა კიბერთავდასხმა კრემლის მხარდამჭერი ჰაკერების მიერ, მას შემდეგ, რაც ევროპულმა ინსტიტუტმა რუსეთი ტერორიზმის სპონსორ სახელმწიფოდ აღიარა.
მისი თქმით, მომხდარზე პასუხისმგებლობა სწორედ კრემლის მომხრე დაჯგუფებამ აიღო.
კიბერთავდასხმა მას შემდეგ, რამდენიმე საათში, მოხდა, რაც ევროპარლამენტმა რეზოლუციის ტექტს კენჭი უყარა.
ევროპარლამენტმა რუსეთი „ტერორიზმის სპონსორ სახელმწიფოდ“ გამოაცხადა. ევროდეპუტატების განცხადებით, რუსეთის მიერ განხორციელებული იერიშები სამოქალაქო ობიექტებზე, როგორიცაა ენერგეტიკული ინფრასტრუქტურა, საავადმყოფოები, სკოლები და თავშესაფრები, საერთაშორისო კანონს არღვევს.