პროკურორის განცხადებით, „ფულის გათეთრების“ საქმეზე სააპელაციო სასამართლომ პირველი ინსტანციის სასამართლოს გადაწყვეტილება უნდა შეცვალოს და ხაზარაძე, ჯაფარიძე და წერეთელი დამნაშავედ ცნოს

პროკურორ არჩილ ტყეშელაშვილის განცხადებით, ე.წ. ფულის გათეთრების საქმეზე თბილისის სააპელაციო სასამართლომ პირველი ინსტანციის სასამართლოს გადაწყვეტილება უნდა შეცვალოს და აღნიშნულ სისხლის სამართლის საქმეზე ბრალდებული პირები: მამუკა ხაზარაძე, ბადრი ჯაფარიძე და ავთანდილ წერეთელი დამნაშავედ ცნოს. ამის შესახებ პროკურორმა ჟურნალისტებს თბილისის სააპელაციო სასამართლოში განუცხადა, სადაც ე.წ. ფულის გათეთრების საქმეზე პროცესი გაიმართა.

“ჩვენ მიგვაჩნია, რომ პირველი ინსტანციის სასამართლოს გადაწყვეტილება არის დაუსაბუთებელი. მიგვაჩნია, რომ სააპელაციო სასამართლომ აღნიშნული გადაწყვეტილება უნდა შეცვალოს და მსჯავრდებული პირები უნდა სცნოს დამნაშავედ სსკ-ის 194-ე მუხლით, რაც გულისხმობს უკანონო შემოსავლის ლეგალიზაციას.

როგორც მოგეხსენებათ, პირველი ინსტანციის სასამართლომ ბრალდების მხარის ყველა მტკიცებულება გაიზიარა, ფაქტები დადგენილად მიიჩნია, თუმცა არასწორი შეფასება მისცა ქმედებას კვალიფიკაციის ნაწილში. ამდენად, მიგვაჩნია, რომ ეს კვალიფიკაცია უნდა შეიცვალოს და დამნაშავედ უნდა ცნონ უკანონო შემოსავლის ლეგალიზაციაში. ჩვენ ვასაჩივრებთ განაჩენს”, - აცხადებს არჩილ ტყეშელაშვილი.

შეგახსენებთ, რომ ე.წ. ფულის გათეთრების საქმეზე ბრალდებულები - მამუკა ხაზარაძე, ბადრი ჯაფარიძე და ავთანდილ წერეთელი თბილისის საქალაქო სასამართლომ დამნაშავედ ცნო. თუმცა, მოსამართლემ სამივე მათგანს მუხლის კვალიფიკაცია შეუცვალა და ისინი ჯგუფურ თაღლითობაში ცნო დამნაშავედ და თითოეულ მათგანს თავისუფლების აღკვეთა შეეფარდათ 7 წლის ვადით, მაგრამ მუხლის ხანდაზმულობის გამო, ისინი დანიშნული სასჯელისგან გათავისუფლდნენ.

ცნობისთვის, მამუკა ხაზარაძეს და ბადრი ჯაფარიძეს ბრალი წარედგინათ 2019 წლის 24 ივლისს ჯგუფურად 16 664 000 ამერიკული დოლარის უკანონო შემოსავლის ლეგალიზაციის ფაქტზე, რასაც თან ახლდა განსაკუთრებით დიდი ოდენობით შემოსავლის მიღება (დანაშაული გათვალისწინებული საქართველოს სისხლის სამართლის კოდექსის 194 მუხლის მე-2 ნაწილის ,,ა“ და მე-3 ნაწილის „გ“ ქვეპუნქტით). რაც შეხება ავთანდილ წერეთელს, პროკურატურა ბიზნესმენს ბადრი ჯაფარიძისთვის და მამუკა ხაზარაძისთვის უკანონო შემოსავლების ლეგალიზებაში დახმარებას ედავებოდა.

კახა გოგოლაშვილი - ევროპარლამენტი საქართველოს ევროკავშირში ინტეგრაციის შესაძლებლობას ზრდის, ახლა ჯერი ჩვენზეა
ქართული პრესის მიმოხილვა 05.12.2022
დავით სიხარულიძე - ისტორიას არ ახსოვს, რომ რომელიმე ქვეყანა ძალით ნატო-ში, ან ევროკავშირში მიეღოთ
კახა ოქრიაშვილი: „ოცნებას“ უკრაინაში გამარჯვების შემდეგ ქართველი პატრიოტების საქართველოში დაბრუნების ეშინია!“
ახალი შესაძლებლობა IT სფეროს წარმომადგენლებისთვის - "Devexperts" უკვე საქართველოშია
2022 წლის საუკეთესო ამერიკული არქიტექტორული კომპანია ბათუმის ხელოვნურ კუნძულზე შენობას დააპროექტებს
როგორ შევარჩიოთ საახალწლო საჩუქარი