ადამიანმა სამკურნალო დაწესებულებაში დაკარგა 40 კილოგრამი, უარესდება და პროგრესირდება სნეულება და იმის პიარი, რომ სააკაშვილი 2012 წლამდე საშინელებებს სჩადიოდა და კარგია, რაც სჭირს, სვავური პოლიტიკაა, - ამის შესახებ "სტრატეგია აღმაშენებლის" დეპუტატმა პაატა მანჯგალაძემ ჟურნალისტებთან განაცხადა.

მისივე თქმით, მას არ აქვს საფუძველი, რომ "ემპათიას" დასკვნას არ ენდოს, რადგან სხვა ალტერნატიული დასკვნა არ უნახავს.

"ჯანდაცვის მინისტრის და ადამიანის უფლებათა კომიტეტის თავმჯდომარეებს შევთავაზე ერთად მივიდეთ "ვივამედში" და ვნახოთ რა მდგომარეობაა. ის, რომ ჩვენ არ ვიცით, ვერ ვხედავთ, ასე არ შეიძლება. ოჯახი ამბობს, რომ შეიძლება დადგეს ლეტალური შედეგი. ეს არის ჩუმი თანხმობის მიცემა უმრავლესობის მხრიდან სააკაშვილის სიკვდილზე, ამას თავის სახელი უნდა დავარქვათ. როცა მეუბნებიან, რომ ადამიანმა სამკურნალო დაწესებულებაში დაკარგა 40 კილოგრამი და უარესდება და პროგრესირდება სნეულება, იმის პიარი, რომ სააკაშვილი 2012 წლამდე საშინელებებს სჩადიოდა და კარგია რაც სჭირს, ეს არის სვავური პოლიტიკა.

რაც შეეხება "ემპათიას" დასკვნას, ჩემს პატივისცემას იმსახურებს ქალბატონი ჯიშკარიანი, არანაირი სხვა ალტერნატიული მოსაზრება არ გვინახავს, არც "ვივამედისგან" გვინახავს ასეთი კვლევა და მინისტრის განცხადება, რომ სააკაშვილს შეუძლია თავის სახსრებით ექიმი ჩამოიყვანოს, სპეკულაციაა. დიაგნოზები არის მძიმე და ექიმის ჩამოსვლა შესაბამისი ლაბორატორიული კვლევების გარეშე, მაღალტექნოლოგიური აპარატურის გარეშე არის ფარსი, ექიმი მხოლოდ ჩამოსვლით ვერ განკურნავს სააკაშვილს და ეს უნდა იცოდეს 21- ე საუკუნეში მინისტრმა,"- განაცხადა მანჯგალაძემ.

ცენტრ „ემპათიას“ ინფორმაციით, საქართველოს მესამე პრეზიდენტს, მიხეილ სააკაშვილს დაახლოებით, 10 დიაგნოზი აქვს, რაც შეუთავსებელს ხდის მის პატიმრობას.