ჯანდაცვის სამინისტრო მედიკამენტებზე რეფერენტული ფასების დაწესების შესახებ, საქართველოს პარლამენტის მიერ კანონპროექტის დაამტკიცების თაობაზე ინფორმაციას ავრცელებს.

,,წამლისა და ფარმაცევტული საქმიანობის შესახებ“ კანონში ცვლილები შედის, რომლის მიხედვითაც მედიკამენტებზე რეფერენტული ფასები დაწესდება.

მათი ცნობით, კანონპროექტი საქართველოს პარლამენტმა, მესამე მოსმენით, 75 ხმით 1-ის წინააღმდეგ, მიიღო.

როგორც უწყებაში აღნიშნავენ, ცვლილების მიხედვით, 2023 წლიდან, სახელმწიფო, მედიკამენტის ღირებულების იმ მაქსიმალურ ზღვარს დაადგენს, რომელზე მაღალ ფასადაც წამლების რეალიზაცია აიკრძალება.

მათი განმარტებით, პირველ ეტაპზე, რეფერენტული ფასები ქრონიკული და ონკოლოგიური დაავადებების სამკურნალო, 1000-1200 პრეპარატზე განისაზღვრება, შემდეგ კი სხვა მედიკამენტებსაც შეეხება.

„ჩვენი მიზანია, საქართველოს მოსახლეობისთვის, ხარისხიან მედიკამენტებზე მაქსიმალური ხელმისაწვდომობა უზრუნველვყოთ. ამისთვის, მთელ რიგ რეფორმებს ვახორციელებთ. ერთ-ერთი კომპონენტი სწორედ რეფერენტული ფასების დაწესებაა, რომლის საშუალებითაც, მედიკამენტებზე ხელმისაწვდომობა კიდევ უფრო გაიზრდება“, - განაცხადა თამარ გაბუნიამ.

მედიკამენტებზე რეფერენტული ფასების დაწესება ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა ზურაბ აზარაშვილმა წლის დასაწყისში დააანონსა. სამუშაო პროცესი, ჯანმრთელობის მსოფლიო ორგანიზაციისა და მსოფლიო ბანკის მხარდაჭერით მიმდინარეობს. აღსანიშნავია, რომ სამინისტროს, მედიკამენტებზე ზღვრული ფასების გამოსათვლელად, შერჩეული აქვს ევროპის რეგიონის 4 რეფერენტული ქვეყანა, რომელთა გამოცდილებასაც, რეფორმაზე მომუშავე ჯგუფი, აქტიურად ეცნობა და იზიარებს.