აფხაზეთის ავტონომიური რესპუბლიკის იძულებით გადაადგილებულ პირთა მინისტრმა თბილისის დევნილთა განსახლების ობიექტებზე ინფრასტრუქტურული სამუშაოები დაათვალიერა
აფხაზეთის ავტონომიური რესპუბლიკის იძულებით გადაადგილებულ პირთა მინისტრი დავით ფაცაცია, სამინისტროს თანამშრომლებთან ერთად, თბილისის რაიონებში მდებარე დევნილთა განსახლების ობიექტებზე განხორციელებულ სარეაბილიტაციო სამუშაოებს გაეცნო.
ამის შესახებ ინფორმაციას აფხაზეთის ავტონომიური რესპუბლიკის მთავრობა ავრცელებს.
მათივე ცნობით, აფხაზეთის ავტონომიური რესპუბლიკის იძულებით გადაადგილებულ პირთა სამინისტროს ინფრასტრუქტურული პროგრამების ფარგლებში, დევნილთა განსახლების ობიექტებზე სახურავების სარეაბილიტაციო სამუშაოები განხორციელდა, ასევე პროექტის ფარგლებში ადგილზე თოვლდამცავი სისტემები მოეწყო, დამონტაჟდა სანიაღვრე მილები და აღდგენა-რეაბილიტაცია ჩაუტარდა წყალშემკრებ სისტემებს.
ამასთან ინფორმაციაში აღნიშნულია, რომ ინფრასტრუქტურული სამუშაოები თბილისში მდებარე დევნილთა განსახლების 5 ობიექტზე განხორციელდა, სადაც 200-მდე დევნილი ოჯახი ცხოვრობს.
„დევნილი მოსახლეობის საჭიროებებისა და სამინისტროში შემოსული განცხადებების გათვალისწინებით, საქართველოს სხვადასხვა რეგიონებში დევნილთა განსახლების ობიექტებზე ვახორციელებთ სახურავების სარეაბილიტაციო სამუშაოებს, რომელთა შესრულებასაც ინტენსიურ მეთვალყურეობას ვუწევთ. ასევე, ვხვდებით ადგილობრივ მოსახლეობას და ადგილზე ვეცნობით მათ სოციალურ და ეკონომიკურ მდგომარეობას“, - განაცხადა დავით ფაცაციამ.
