წითელი ჯვრისა და წითელი ნახევარმთვარის საერთაშორისო ფედერაციის (IFRC) ორგანიზებით, სამხრეთ კავკასიის რეგიონის მასშტაბით უკანასკნელი 2 წლის განმავლობაში Covid-19 პანდემიაზე რეაგირების შეჯამებასთან და მიმოხილვასთან დაკავშირებით შემაჯამებელი შეხვედრა გაიმართა.

აღნიშნულთან დაკავშირებით ინფორმაციას წითელი ჯვარი ავრცელებს.

ღონისძიება სასტუმრო „რედისონ ბლუ ივერიაში“ გაიმართა.

„შეხვედრა მისასალმებელი სიტყვით გახსნა წითელი ჯვრისა და წითელი ნახევარმთვარის საერთაშორისო ფედერაციის (IFRC) ვიცე-პრეზიდენტმა და საქართველოს წითელი ჯვრის საზოგადოების (GRCS) პრეზიდენტმა, ნათია ლოლაძემ. შეხვედრის ფარგლებში სამხრეთ კავკასიის რეგიონის სამი ეროვნული საზოგადოების წარმომადგენლებმა - საქართველოს წითელი ჯვრის საზოგადოებამ (GRCS), სომხეთის წითელი ჯვრის საზოგადოებამ (ARCS) და აზერბაიჯანის წითელი ნახევარმთვარის საზოგადოებამ (AzRCS) - მოხსენებები ეროვნულ დონეზე Covid-19 პანდემიის ფარგლებში განხორციელებულ აქტივობებთან დაკავშირებით გააკეთეს. შეხვედრას ესწრებოდნენ წითელი ჯვრისა და წითელი ნახევარმთვარის მოძრაობის წევრი ქვეყნების, სხვადასხვა საელჩოებისა და ჯანდაცვის სფეროში მოღვაწე ორგანიზაციების წარმომადგენლები. შეხვედრის მონაწილეებმა განიხილეს სამომავლო თანამშრომლობისა და მიღწეული შედეგების მდგრადობის შენარჩუნების შესაძლებლობები“, - ნათქვამია გავრცელებულ ინფორმაციაში.