ლატვიის სახელმწიფო უსაფრთხოების სამსახური (VDD) ტელეარხ „დოჟდზე” გასულ ეთერთან დაკავშირებით გამოძიებას იწყებს. ინფორმაციას ამის შესახებ VDD-ის ოფიციალური ვებსაიტი ავრცელებს.

აღინიშნება, რომ ლატვიის სახელმწიფო უსაფრთხოების სამსახურმა გამოძიება დაიწყო სკანდალურ განცხადებებთან დაკავშირებით, რომლებიც ლატვიაში რეგისტრირებული TV Rain-ის (“დოჟდის”) ახალი ამბების პროგრამაში გაკეთდა და რომლებიც რუსეთის საოკუპაციო ჯარების ჯარისკაცებისთვის დახმარების გაწევის ეჭვს აჩენს.

აღნიშნული განცხადებები 1 დეკემბერს “დოჟდზე” ახალი ამბების პროგრამაში გაკეთდა. გადაცემის მსვლელობისას მისმა წამყვანმა მაყურებლებს შესთავაზა მიეწოდებინათ ინფორმაცია ფრონტზე მობილიზებული რუსი მოქალაქეების პირობების შესახებ და იმედი გამოთქვა, რომ ტელეარხმა უკვე შეძლო ბევრ რუს ჯარისკაცს დახმარებოდა „აღჭურვილობითა და ელემენტარული კომფორტის უზრუნველყოფით”.

VDD აღნიშნავს, რომ უკრაინისა და მისი ხალხის წინააღმდეგ რუსი საოკუპაციო ჯარების მიერ ჩადენილი დანაშაულების გათვალისწინებით, რუსეთისადმი ნებისმიერი დახმარების გაწევა დაუშვებელია. ლატვიის სახელმწიფო უსაფრთხოების სამსახური ასევე აღნიშნავს, რომ სისხლის სამართლის პასუხისმგებლობა გათვალისწინებულია ფინანსური საშუალებების ან ნებისმიერი სხვა საკუთრების პირდაპირი ან ირიბი შეგროვებისთვის ან გადაცემისთვის მხარისთვის, რომლის საქმიანობაც მიმართულია რომელიმე ქვეყნის ტერიტორიული მთლიანობის ან პოლიტიკური დამოუკიდებლობის წინააღმდეგ.

„დოჟდის” საინფორმაციო სამსახურის ხელმძღვანელმა ეკატერინა კოტრიკაძემ ტელეარხის რედაქციის სახელით ამ ფრაზას “მცდარი და “დოჟდის” მთელი რედაქციისთვის კატეგორიულად მიუღებელი” უწოდა. ასევე ცნობილი გახდა, რომ 2 დეკემბერს “დოჟდმა” თანამშრომლობა შეწყვიტა სკანდალური ფრაზის ავტორთან, ალექსეი კოროსტელევთან.