ჰუმანიტარული დახმარების და გენერატორების გაგზავნა რა გაუხდა ამ ადამიანებს? - ის, რომ უნდათ, პირნათელი იყვნენ საკუთარი ბატონ-პატრონების ან საკუთარი მხარდამჭერების წინაშე მოსკოვში, - ამის შესახებ „სტრატეგია აღმაშენებლის“ თავმჯდომარე გიორგი ვაშაძემ ჟურნალისტებთან საუბრისას განაცხადა.

მისივე თქმით, განცხადებები, რომელსაც საქართველოს პრემიერ-მინისტრი ირაკლი ღარიბაშვილი ბოლო დღეების განმავლობაში აკეთებს, ქვეყნის ეროვნული ინტერესების წინააღმდეგ არის მიმართული, შეურაცხყოფას აყენებს საქართველოს მოქალაქეებს და ქართველ გმირებს, რომლებიც უკრაინაში იბრძვიან.

როგორც ვაშაძემ აღნიშნა, პრემიერის განცხადებები კიდევ ერთხელ ადასტურებს, რომ „ქართული ოცნება“ რუსეთის მხარესაა.

„ღარიბაშვილი არ ელაპარაკება საქართველოს მოქალაქეებს, ჩვენს ამერიკელ და ევროპელ პარტნიორებს. ღარიბაშვილი ელაპარაკება მოსკოვს და შეიძლება, მათ მომავალ წელს მშვიდობის გარანტად საქართველოში, საერთოდ რუსეთი წარმოგვიდგინონ. ეს არის გზა ღალატის. ეს არის გზა საქართველოს ეროვნული ინტერესების წინააღმდეგ“, - განაცხადა ვაშაძემ.

რაც შეეხება შეხვედრას, რომელიც „ნაციონალური მოძრაობის“ ოფისში მიმდინარეობს, როგორც ვაშაძე განმარტავს, ქვეყნის მესამე პრეზიდენტის, მიხეილ სააკაშვილის გადასარჩენად ერთიანი და კოორდინირებული ქმედებები აუცილებელია.

„ჩვენ ჯერ მოვისმენთ, რას გეგმავს „ნაციონალური მოძრაობა“. გვაქვს მოსაზრებები სხვადასხვა საკითხთან დაკავშირებით და ამაზე სამუშაო ფორმატში ვიმსჯელებთ,“ - განაცხადა ვაშაძე.

ცნობისთვის, სამი ოპოზიციური პარტიის გაერთიანება (ზურა - გირჩი ჯაფარიძე, ელენე ხოშტარია და გიორგი ვაშაძე) მიხეილ სააკაშვილის ჯანმრთელობის საკითხთან დაკავშირებით, „ნაციონალურ მოძრაობასთან“ შეხვედრას მართავს.