შეერთებულმა შტატებმა სანქციები დაუწესა საერთაშორისო კომპანიების ქსელს, თურქი ბიზნესმენის სიტკი აიანის ხელმძღვანელობით, რომლებიც ასობით მილიონი აშშ დოლარის ღირებულების ირანული ნავთობით საერთაშორისო ემბარგოს გვერდის ავლით ვაჭრობას უწყობდნენ ხელს, - ინფორმაციას მედიასაშუალებები აშშ-ის ფინანსთა სამინისტროზე დაყრდნობით ავრცელებენ.

მათივე ცნობით, აშშ-ის ფინანსთა სამინისტროს საგარეო აქტივების კონტროლის ოფისმა სასანქციო სიაში შეიყვანა ოთხი ფიზიკური და 26 იურიდიული პირი.

აშშ-ის ფინანსთა სამინისტროს ინფორმაციით, აიანის კომპანიებმა გააფორმეს ასობით მილიონი დოლარის ღირებულების კონტრაქტები იმ მიზნით, რომ ირანული ნავთობი მიეყიდათ სხვადასხვა მყიდველებისთვის ჩინეთის სახალხო რესპუბლიკაში და აღმოსავლეთ აზიის სხვა ტერიტორიაზე, არაბთა გაერთიანებულ საამიროებსა და ევროპაში, ხელი შეუწყვეს ნავთობის ტრანსპორტირებას და ნავთობის გაყიდვიდან მიღებული შემოსავლები ირანის ისლამური რევოლუციის გუშაგთა კორპუსს გადასცეს.