ბრიუსელში დღეს ევროკავშირისა და აღმოსავლეთ პარტნიორობის ქვეყნების, მათ შორის საქართველოს, საგარეო მინისტრების შეხვედრა გაიმართება
ბრიუსელში დღეს აღმოსავლეთ პარტნიორობის მინისტერიალის შეხვედრა გაიმართება, რომელსაც ევროკავშირის და საქართველოს, სომხეთის, აზერბაიჯანის, მოლდოვისა და უკრაინის საგარეო საქმეთა მინისტრები დაესწრებიან.
შეხვედრა უსაფრთხოების პოლიტიკისა და საგარეო საკითხებში ევროკავშირის უმაღლესი წარმომადგენლის, ჯოზეფ ბორელის ხელმძღვანელობით გაიმართება და მასში მონაწილეობას მიიღებს ევროკომისარი ოლივერ ვარჰეი.
„დისკუსიის მიზანი იქნება, განსაზღვროს „აღმოსავლეთ პარტნიორობის“ მომავალი, ისევე როგორც რუსეთის უკრაინაში შეჭრის გავლენები და რეგიონში შექმნილი უსაფრთხოების გამოწვევები. ევროკავშირისა და „აღმოსავლეთ პარტნიორობის“ მინისტერიალის მონაწილეები გაცვლიან მოსაზრებებს, როგორ შეიძლება, „აღმოსავლეთ პარტნიორობამ“ უზრუნველყოს სტაბილურობის გაძლიერება და რეგიონში კეთილდღეობა. მინისტრები განიხილავენ, კერძოდ, როგორ დაუჭირონ მხარი პარტნიორების მდგრადობას, როგორ დააახლოონ ევროკავშირი და მისი აღმოსავლელი პარტნიორები და უზრუნველყონ კანონის უზენაესობისა და რეფორმების წინსვლა მთელ რეგიონში“, - აღნიშნულია დაგეგმილი შეხვედრის შესახებ ევროკავშირის საბჭოს მიერ გავრცელებულ ინფორმაციაში.
მათივე ცნობით, მონაწილეები ასევე განიხილავენ როგორ დააჩქარონ ეკონომიკური და საინვესტიციო გეგმის, როგორც მწვანე და ციფრული ცვლილებების, ისევე, როგორც რეგიონის სოციალურ-ეკონომიკური აღდგენის ძირითადი საშუალების, შექმნა.
