უკრაინის საგარეო საქმეთა სამინისტროს პრესსპიკერის, ოლეგ ნიკოლენკოს განცხადებით კიევის საელჩომ საბერძნეთში ანონიმური სისხლიანი ამანათი მიიღო.

„საბერძნეთის პოლიციამ გამოძიება დაიწყო მას შემდეგ, რაც პაკეტი ათენში უკრაინის საელჩოში მივიდა“, - წერს ნიკოლენკო „ფეისბუქზე“.

მისი თქმით, გამგზავნის მისამართი იგივეა, რაც დანარჩენ კონვერტებზე, რომლებიც უკრაინის საელჩოებმა და საკონსულოებმა მანამდე მიიღეს: Tesla-ს ავტომობილების შოურუმი გერმანიის ქალაქ ზინდელფინგენში.

შეგახსენებთ, უკრაინის ხელისუფლების ინფორმაციით, უკრაინის საელჩოებმა სხვადასხვა ქვეყანაში „სისხლიანი“ ამანათები მიიღეს. ზოგიერთ მათგანში ცხოველების თვალები იყო განთავსებული. ამასთან, გასულ თვეში მადრიდში, უკრაინის საელჩოში კონვერტით გაგზავნილი ბომბი აფეთქდა, რის შედეგადაც საელჩოს ერთი თანამშრომელი დაშავდა.