ევროპული საბჭო - ევროკავშირმა საკუთარი ერთგულება დაადასტურა „აღმოსავლეთ პარტნიორობის“ მიმართ და მზადაა, უფრო მოქნილი და პარტნიორების საჭიროებებზე მორგებული გახადოს
„აღმოსავლეთ პარტნიორობის“ მინისტერიალისას ევროკავშირმა საკუთარი ერთგულება დაადასტურა „აღმოსავლეთ პარტნიორობის“ მიმართ და მზადაა, ის უფრო მოქნილი და პარტნიორების საჭიროებებზე მორგებული გახადოს. ამის შესახებ ევროპული საბჭოს ოფიციალურ ვებგვერდზე გამოქვეყნებულ ინფორმაციაშია აღნიშნული.
ამასთან, პრესრელიზში აღნიშნულია, რომ ერთმანეთს უნდა ავსებდეს „აღმოსავლეთ პარტნიორობის“ წევრ ქვეყნებთან ორმხრივი თანამშრომლობა და ევროკავშირის გაფართოების პროცესი.
ოფიციალური განცხადების თანახმად, უსაფრთხოებასთან დაკავშირებით, ევროკავშირი გააგრძელებს იმ აღმოსავლეთ პარტნიორების მხარდაჭერას, რომლებსაც სურთ სხვადასხვა სახის თანამშრომლობა და ჩართულობა, მათ შორის კიბერ, ჰიბრიდული და სხვა არასამხედრო საშუალებების მიწოდებით რეგიონში მათი მედეგობისა და სტაბილურობის განსამტკიცებლად.
გარდა ამისა, დაკავშირებადობის საკითხების განსახილველად, ევროკავშირი განიხილავს შესაძლებლობას, მიიწვიოს პარტნიორები სხვა რეგიონებიდან, მათ შორის ცენტრალური აზიიდან.
შეგახსენებთ, დღეს, ბრიუსელში, „აღმოსავლეთ პარტნიორობის“ მინისტერიალი გაიმართა, რომელშიც მონაწილეობას ევროკავშირის წევრი ქვეყნების, ისევე როგორც, საქართველოს, სომხეთის, აზერბაიჯანის, მოლდოვისა და უკრაინის საგარეო საქმეთა მინისტრები იღებდნენ. შეხვედრას ესწრებოდა საგარეო პოლიტიკისა და უსაფრთხოების საკითხებში ევროკავშირის უმაღლესი წარმომადგენელი ჯოზეფ ბორელი და გაფართოების საკითხებში ევროკომისარი ოლივერ ვარჰეიც.
