საქართველოს მესამე პრეზიდენტის მიხეილ სააკაშვილის ერთ-ერთი ადვოკატის, შალვა ხაჭაპურიძის განცხადებით, მიხეილ სააკაშვილის შესახებ სახელმწიფო დეპარტამენტის განცხადება ძალიან მნიშვნელოვანია.
როგორც მან ჟურნალისტებს განუცხადა, ეს განცხადება მიანიშნებს იმას, რომ აშშ დიდ ყურადღებას აქცევს ამ საკითხს და მის გადაწყვეტაში მაქსიმალურად ჩაერთვება.
„სახელმწიფო დეპარტამენტის განცხადებაში საინტერესო ტერმინია ნახსენები, რომელიც ამდენ ხანს არასდროს ყოფილა სააკაშვილის საქმეში ნახსენები, სიტყვა "ადვოკატირება" გაჟღერდა, ეს ძალიან მნიშვნელოვანია. სახელმწიფო დეპარტამენტი აპირებს, რომ ამ საქმის ადვოკატირება მოახდინოს, რაც იშვიათი მოვლენაა. ადვოკატირება ნიშნავს იმას, რომ ისინი განსაკუთრებული კონტროლის ქვეშ აიყვანენ ამ საქმეს და მაქსიმალურად ჩაერთვებიან ამ საკითხის გადაწყვეტაში", - განაცხადა ხაჭაპურიძემ.
ცნობისთვის, აშშ-ის სახელმწიფო დეპარტამენტის განცხადებით, მიხეილ სააკაშვილის ყველა ძირითად უფლებაზე, მათ შორის, შესაბამისი მკურნალობის უფლებაზეც, პასუხისმგებელი საქართველოს ხელისუფლებაა. როგორც აშშ-ის საგარეო უწყების მიერ „ამერიკის ხმისთვის“ მიცემულ კომენტარშია ნათქვამი, ამერიკის სახელმწიფო დეპარტამენტი საქართველოს ყოფილი პრეზიდენტის, მიხეილ სააკაშვილის მკურნალობას „ძალიან ახლოდან აკვირდება“.