თუ ადამიანი ნებას გამოხატავს, რომ იყოს სხვა ქვეყნის მოქალაქე, მისი ინტერესები უფრო მეტად ემსახურება სხვა ქვეყნის ინტერესებს, ასეთ ადამიანს თუ ჩამოერთმევა მოქალაქეობა, ეს ჩვეულებრივი თანამედროვე კანონის გამოძახილია, - ამის შესახებ თავდაცვის მინისტრმა ჯუანშერ ბურჭულაძემ ჟურნალისტებთან განაცხადა, რითაც უპასუხა მამუკა მდინარაძის მიერ გაკეთებულ განცხადებაზე დასმულ კითხვას, რომლის თანახმად, როცა საქართველოს მოქალაქეები უკრაინაში მიჰყავთ, არ უმარტავენ საკითხს იმის თაობაზე, რომ სხვა ქვეყნის სამხედრო სამსახურში ყოფნა იწვევს საქართველოს მოქალაქეობის დაკარგვას.

„თქვენ კომპეტენციას გიწუნებთ, მაგრამ კიდევ ერთს გკითხავთ - თუ კანონში არის ჩანაწერი, რომ პირი, რომელიც მსახურობს სხვა ქვეყნის შეიარაღებულ ძალებში, უნდა დაკარგოს მოქალაქეობა, ეს ანტიკონსტიტუციურია თქვენი აზრით? გეკითხებით, ამ სულისკვეთებას აქვს თუ არა ლოგიკა? ვის ჩამოერთვა მოქალაქეობა? თუ ადამიანი ნებას გამოხატავს, რომ იყოს სხვა ქვეყნის მოქალაქე, მისი ინტერესები უფრო მეტად ემსახურება სხვა ქვეყნის ინტერესებს, ასეთ ადამიანს თუ ჩამოერთმევა მოქალაქეობა, ეს ჩვეულებრივი თანამედროვე კანონის გამოძახილია. ვისი ნებაც არ არის გამოხატული, რომ მისთვის უფრო ღირებულია სხვა ქვეყნის ინტერესების დაცვა, ვიდრე თავის მოქალაქეობის მქონე ქვეყნის ინტერესების დაცვა, ეს ნიშნავს [მოქალაქეობის] ნებაყოფლობით დატოვებას”, - განაცხადა ბურჭულაძემ.