რაც მოხდა, ეს ყველაფერი სრულ უზნეობად მიმაჩნია და ვისაც არ უნდა ეხებოდეს, ნებისმიერ ადამიანს, მითუმეტეს პრეზიდენტის შემთხვევაში საერთოდ წარმოუდგენელია, არცერთ ცივილურ ქვეყანაში ეს არ მოხდებოდა, მაგრამ ეს ამავე დროს არის მთავარიდან მეორეხარისხოვანზე გადატანის მცდელობა, - ამის შესახებ საქართველოს მესამე პრეზიდენტის დედამ, გიული ალასანიამ მიხეილ სააკაშვილის კლინიკა „ვივამედში“ მონახულებამდე განაცხადა.

მისი თქმით, პენიტენციური სამსახურის მიერ გავრცელებული დეკემბრის კადრები არ ასახავს სრულ სურათს.

„რაც მოხდა ეს ყველაფერი სრულ უზნეობად მიმაჩნია და ვისაც არ უნდა ეხებოდეს, ნებისმიერ ადამიანს, მით უმეტეს პრეზიდენტის შემთხვევაში საერთოდ წარმოუდგენელია, არცერთ ცივილურ ქვეყანაში ეს არ მოხდებოდა, მაგრამ ეს ამავე დროს არის მთავარიდან მეორეხარისხოვანზე გადატანის მცდელობა. იმიტომ, რომ ჩემთვის, პირველი, მეორე, მესამე, მეოთხე თუ მეხუთე ადგილი აქვს მიხეილ სააკაშვილის ჯანმრთელობას. ყველაფერი დანარჩენი არის მე-10 ხარისხოვანი. სხვათა შორის ის, რაც დეკემბრის კადრებია ნაჩვენები, არ ასახავს სრულ სურათს, როგორც წესი მე არც ერთხელ არ მინახავს ფეხზე დამდგარი, თუნდაც დამხმარე საშუალებითაც კი, როგორც წესი ის სულ წევს.

შეთანხმება უნდა ყოფილიყო, თუნდაც პატიმართან, რომ ეს კადრები გასაჯაროებულიყო. ჩემი შვილი დღეს მოითხოვს დაუყოვნებლივ მკურნალობას და დეტოქსიკაციას, რადგან ადამიანი მოწამლულია. ყოველ წუთს შეიძლება დასჭირდეს ინტუბირება, ყოველ წუთს შეიძლება დასრულდეს მისი სიცოცხლე. საერთოდ, როდემდე ვითამაშოთ და ვდგათ სპექტაკლები, ხან კადრები იქნება, ხან კიდევ რაღაც იქნება, ვიღაცამ კიდევ რაღაც თქვა, მერე ჩვენ რა და მის ჯანმრთელობას რა?! ევროპარლამენტარებმა მიიღეს ძალიან მკაცრი დოკუმენტი, დაუყოვნებლივ გათავისუფლებაზე“, -განაცხადა ალასანიამ.

რაც შეეხება „ნაციონალური მოძრაობის“ წევრების დავით კირკიტაძის, ანა წითლიძის და აბდულა ისმაილოვის მიერ პარლამენტში შიმშილობის დაწყებას, გიული ალასანია განმარტავს, რომ „ყველა შემთხვევაში ეს თავგანწირვაა და ძალიან დიდი მადლობა მათ.“

„ძალიან დიდი მადლობა მათ, ინდივიდუალურად ყველა პიროვნება გადაწყვეტილებას თვითონ იღებს. მე არ მგონია, რომ მაინცდამაინც ეს ჩემს შვილთან შეთანხმებული უნდა იყოს, არ ვფიქრობ ასე. ყველა შემთხვევაში ეს თავგანწირვაა და ძალიან დიდი მადლობა მათ“, -აღნიშნა გიული ალასანიამ.