თეონა აქუბარდია - შერიგების საკითხებში სახელმწიფო მინისტრის 11-გვერდიან ანგარიშში "რუსეთის ფედერაცია" არსად მოხსენიებული არ არის - ჩემი თხოვნა იქნება, მტერს სახელი დავარქვათ
ჩემთვის ძალიან რთულია, როდესაც შერიგების საკითხებში სახელმწიფო მინისტრის 11-გვერდიან ანგარიშში რუსეთის ფედერაცია ერთი სიტყვით არსად მოხსენიებული არ არის, მიუხედავად იმისა, რომ ყველამ ძალიან კარგად ვიცით, რომ ოკუპაცია რუსეთის ფედერაციიდან მომდინარეობს! , - ეს განცხადება ოპოზიციონერმა დეპუტატმა თეონა აქუბარდიამ პარლამენტის პლენარულ სხდომაზე გააკეთა, სადაც “მინისტრის საათის“ ფორმატში სახელმწიფო მინისტრს თეა ახვლედიანს უსმენენ.
როგორც აქუბარდიამ აღნიშნა, ის შერიგების საკითხებში სახელმწიფო მინისტრის ანგარიშს გულდასმით გაეცნო და პარლამენტში წარდგენილ დოკუმენტში რუსეთის ფედერაცია ნახსენები არ არის, რაც, მისივე თქმით, არის პრობლემა.
“ეს მახსენებს უკრაინის მხარდასაჭერად პარლამენტის მიერ მიღებულ რეზოლუციას, როცა მასში რუსეთი ვერ ჩავწერეთ. ჩემი თხოვნა იქნება, მტერს სახელი დავარქვათ, რომელსაც ყველამ ვიცით, რომ რუსეთი ჰქვია და როდესაც ოკუპაციაზე ვსაუბრობთ, დავარქვათ მას რუსული ოკუპაცია. მნიშვნელოვანია სახელმწიფომ შეძლოს და მტერს თავისი სახელი დაარქვას“, - მიმართა აქუბარდიამ თეა ახვლედიანს.
