ინფრასტრუქტურის წინააღმდეგ დარტყმების გამო პუტინის წინააღმდეგ ჰააგაში შესაძლოა გამოძიება დაიწყოს, - ამის შესახებ გერმანიის იუსტიციის მინისტრმა, მარკო ბუშმანმა მედიაჯგუფ RedaktionsNetzwerk Deutschland-ის გამოცემებთან ინტერვიუში განაცხადა.
ბუშმანმა აღნიშნა, რომ ადამიანურობის წინააღმდეგ მიმართული დანაშაულების გამო რუსეთის პრეზიდენტი ვლადიმირ პუტინი შესაძლოა ჰააგაში მდებარე სისხლის სამართლის საერთაშორისო სასამართლოს გამოძიების ობიექტი გახდეს.
“და ეს ჰიპოთეტური საქმე არაა”, - აღნიშნა ბუშმანმა.
მინისტრმა აღნიშნა, რომ თუ სამოქალაქო ინფრასტრუქტურის გამიზნული განადგურების შედეგად ხალხი დაბალ ტემპერატურაში გათბობისა და ელექტროენერგიის გარეშე რჩება, ეს შეიძლება ადამიანურობის წინააღმდეგ მიმართულ დანაშაულად შეფასდეს. ბუშმანმა აღნიშნა, რომ პუტინის პირდაპირი პასუხისმგებლობის ნიშნად შესაძლოა მისი სატელევიზიო გამოსვლები გამოდგეს, სადაც რუსეთის პრეზიდენტი ამბობს, რომ ასეთი დარტყმები განზრახ ტაქტიკას წარმოადგენს.
