19 დეკემბერს, კავკასიის საერთაშორისო უნივერსიტეტში (CIU) წიგნის „საქართველოს 1995 წლის კონსტიტუცია: ქმნადობის მისადგომებთან“ („საქართველოს კონსტიტუციის პროექტები 1993-1995“) და „კონსტიტუციური დემოკრატიის სამეცნიერო-კვლევითი ინსტიტუტის“ პრეზენტაცია გაიმართება. ინფორმაციას კავკასიის საერთაშორისო უნივერსიტეტი ავრცელებს.

მათი ცნობით, კრებულის ავტორ-შემდგენლები არიან კავკასიის საერთაშორისო უნივერსიტეტის ემერიტუსი პროფესორი მინდია უგრეხელიძე და ასოცირებული პროფესორი ბექა ქანთარია.

„წიგნის საერთო რედაქცია ეკუთვნის გამოჩენილ ინგლისელ იურისტს, ადამიანის უფლებათა საერთაშორისო სამართლის დარგში ევროსაბჭოს ექსპერტს პირს გარდნერს.

წიგნი, რომელიც გამოიცა საქართველოს მეცნიერებათა ეროვნული აკადემიისა და კავკასიის საერთაშორისო უნივერსიტეტის ეგიდით, ასახავს 1993-1995 წლებში საქართველოს სახელმწიფო საკონსტიტუციო კომისიაში სხვადასხვა პოლიტიკური პარტიისა თუ ორგანიზაციის მიერ წარდგენილ კონსტიტუციის 12 პროექტს. სწორედ მათ დაეფუძნა 1995 წლის მოქმედი კონსტიტუცია.

ღონისძიებას დაესწრებიან საქართველოს პარლამენტის დეპუტატები, აღმასრულებელი ხელისუფლების, პოლიტიკური პარტიების წარმომადგენლები, საქართველოს 1993-1995 წლების სახელმწიფო საკონსტიტუციო კომისიის, საქართველოს მეცნიერებათა ეროვნული აკადემიის წევრები, საქართველოს საკონსტიტუციო და უზენაესი სასამართლოს მოსამართლეები, სამართლისმცოდნეები და სტუდენტები“,-აღნიშნულია ინფორმაციაში.