სპეციალურმა საგამოძიებო სამსახურმა, „TV პირველის“ ჟურნალისტებისთვის პროფესიულ საქმიანობაში უკანონოდ ხელის შეშლის ფაქტზე, საქართველოს სისხლის სამართლის კოდექსის 154-ე მუხლის პირველი ნაწილით გათვალისწინებული დანაშაულის ნიშნებით გამოძიება დაიწყო.

ინფორმაციას ამის შესახებ სპეციალურმა საგამოძიებო სამსახური ავრცელებს.

„სპეციალური საგამოძიებო სამსახური, სწრაფი და ობიექტური გამოძიების უზრუნველსაყოფად, ყველა საჭირო საგამოძიებო და საპროცესო მოქმედებას ატარებს.

ჟურნალისტების უფლებების და მათი პროფესიული საქმიანობის დაცვა სპეციალური საგამოძიებო სამსახურის ერთ-ერთი მთავარი პრიორიტეტია. სპეციალური საგამოძიებო სამსახური ყველაფერს აკეთებს, რათა ამ ტიპის საქმეების გამოძიება სწრაფი და ეფექტიანი იყოს,“ - აღნიშნულია უწყების მიერ გავრცელებულ განცხადებაში.

ცნობისთვის, ფონიჭალაში მიმდინარე სპეცოპერაციის დროს, „ტვ პირველის“ გადამღებ ჯგუფს ფიზიკური შეურაცხყოფა მიაყენეს. არსებული ინფორმაციით, გადამღებ ჯგუფს ფიზიკურად ერთ-ერთი დაკავებულის ოჯახის წევრები გაუსწორდნენ.