დარწმუნებული ვარ, რომ ეს ყველაფერი იმართებოდა სუს-ისა და „ქართული ოცნების“ მიერ, - ეს განცხადება „ერთიანი ნაციონალური მოძრაობის“ ბათუმის ორგანიზაციის თავმჯდომარე გიორგი კირთაძემ ჟურნალისტებს განუცხადა.

მან რამდენიმე წუთის წინ სპეციალური საგამოძიებო სამსახურის ბათუმის ოფისი დატოვა. იგი გამოკითხვაზე იმყოფებოდა.

გიორგი კირთაძის თქმით, თავდასხმის ფაქტზე პასუხისმგებლობა სახელმწიფომ უნდა აიღოს.

„ერთ ადამიანზე ჯოხის გადატეხა, თითქოს ის არის გაბრაზებული გიორგი კირთაძეზე ან „ნაციონალურ მოძრაობაზე“, იქნება სრული უპასუხისმგებლობა სახელმწიფოს მხრიდან. ეს იყო ორგანიზებული ქმედება და ვითხოვ ორგანიზატორების დასჯას, იმ ადამიანების, ვინც ბოღმისა და სიძულვილის დათესვით არიან დაკავებულები საზოგადოებაში. დარწმუნებული ვარ, რომ ეს ყველაფერი იმართებოდა სუს-ისა და „ქართული ოცნების“ მიერ“, - განაცხადა გიორგი კირთაძემ.

შეგახსენებთ, რომ აჭარის უმაღლეს საბჭოში „ნაციონალური მოძრაობის“ წევრს და ბათუმში, ამავე პარტიის ორგანიზაციის თავმჯდომარეს, გიორგი კირთაძეს თავს გუშინ იმ დროს დაესხნენ, როცა ის ერთ-ერთი ტელეკომპანიის პირდაპირ ეთერში საუბრობდა. უცნობმა მამაკაცმა მას კვერცხები ესროლა. ადგილი ჰქონდა ფიზიკურ და სიტყვიერ შეურაცხყოფასაც.