სებასტიან მოლინეუსი - საქართველო დღეს პირველ ადგილზეა საჯარო ფინანსების მართვის სისტემით, ეს უდავოდ ძალიან შთამბეჭდავი მიღწევაა

საქართველო დღეს პირველ ადგილზეა განვითარებადი ბაზრებისა და ქვეყნების რეიტინგში თავისი საჯარო ფინანსების მართვის სისტემით და 2016 წლის მეთოდოლოგიის გამოყენებით. ეს უდავოდ ძალიან შთამბეჭდავი მიღწევაა. ეს დასტურდება სხვა საერთაშორისო კვლევებითაც, მაგალითად, „ღია ბიუჯეტის ინდექსით“, სადაც საქართველო ბიუჯეტის გამჭვირვალობის ნიშნით პირველ ადგილზეა, - ამის შესახებ მსოფლიო ბანკის რეგიონულმა დირექტორმა სამხრეთ კავკასიაში, სებასტიან მოლინეუსმა 2022 წლის საქართველოს სახელმწიფო ხარჯებისა და ფინანსური ანგარიშვალდებულების (PEFA) და გენდერულ ასპექტებზე ორიენტირებული საჯარო ფინანსების მართვის (GRPFM) შეფასების ანგარიშების პრეზენტაციაზე განაცხადა.

ამის შესახებ ინფორმაციას ფინანსთა სამინისტრო ავრცელებს.

მოლინეუსის თქმით, მნიშვნელოვანია, რომ საქართველო შედეგებს მუდმივად აუმჯობესებს.

„ძალიან მახარებს ის ფაქტი, რომ საქართველოს ასეთ წარმატებულ შედეგებს ვხედავ. პრინციპში, 2018 წლიდან ძალიან ძლიერი წინსვლის მომსწრენი ვართ. 15 მიმართულების ნაცვლად, უკვე 27 შემთხვევაშია უმაღლესი (A) შეფასება. ჯამში, 31 მიმართულებაა. ეს შედეგი, ჩემი აზრით, ძალიან კარგი გაუმჯობესების მანიშნებელია. წელს, სიახლის მომსწრენიც გავხდით, რადგან გენდერული ასპექტები მოვარგეთ ამ ინსტრუმენტს და საჯარო ფინანსების მართვის სისტემა ამ ჭრილშიც შევაფასეთ საქართველოში. ამ სფეროში წინსვლას რომ ვაანალიზებთ, ცხადი ხდება, რომ ოდნავ მეტი სამუშაოს შესრულებაა საჭირო და სიამოვნებით ვაგრძელებთ ძლიერ პარტნიორობას ფინანსთა სამინისტროსთან ამ მიმართულებით თანამშრომლობის გასაუმჯობესებლად. მადლობა მინდა გადავუხადო პარტნიორებს, განსაკუთრებით, ევროკავშირს და სხვებს ამ ანგარიშზე მუშაობის კონტექსტში, ასეთი ძლიერი თანამშრომლობისთვის“, - განაცხადა მსოფლიო ბანკის რეგიონულმა დირექტორმა სამხრეთ კავკასიაში, სებასტიან მოლინეუსმა.

ცნობისთვის, 2022 წლის სახელმწიფო ხარჯებისა და ფინანსური ანგარიშვალდებულების (PEFA) გლობალური ანგარიშის მიხედვით, PEFA-ს შეფასებით, საჯარო ფინანსების მართვის მუდმივი გაუმჯობესებით, საქართველო მსოფლიოს 59 ქვეყანას შორის პირველ ადგილზეა. სახელმწიფო ხარჯებისა და ფინანსური ანგარიშვალდებულების (PEFA) შეფასების შედეგების მიხედვით, წარმოდგენილი 31 ინდიკატორიდან 27 გაუმჯობესდა ან შენარჩუნდა 2018 წლის შეფასებასთან შედარებით.

საქართველოს სახელმწიფო ხარჯებისა და ფინანსური ანგარიშვალდებულების (PEFA) და გენდერულ ასპექტებზე ორიენტირებული საჯარო ფინანსების მართვის (GRPFM) შეფასების ანგარიშები მსოფლიო ბანკმა ფინანსთა სამინისტროს ჩართულობით და ევროკავშირის მხარდაჭერით განახორციელა.

პაატა ზაქარეიშვილი - ხელისუფლება თავისი პოლიტიკით საქართველოსა და კავკასიაში  რუსეთის პოზიციებს აძლიერებს
ქართული პრესის მიმოხილვა 02.02.2023
ლევან  შენგელია - საქართველოს შემთხვევაში „სუვერენული დემოკრატია“ საგარეო-პოლიტიკური ორიენტაციის ხასიათსაც ატარებს და ის აშკარად არ არის დასავლეთისკენ მიმართული
Apple-ისთვის პროგრამული ენის შესასწავლად BTU IOS LAB-ში საბავშვო კოდინგის კურსი დასრულდა
ბორუსან კატმა კოლეჯ „სპექტრში“ სასწავლო ცენტრი გახსნა
კახა ოქრიაშვილი NDI-ის კვლევაზე - მოსახლეობის ნახევარი უმუშევარია - აი, ეს არის სიმართლე
ლიბერთი განათლებისთვის - ლიბერთი 2023 წლის ათასწლეულის ინოვაციის კონკურსის ოფიციალური პარტნიორია