ბენიამინ ნეთანიაჰუმ ისრაელის პრეზიდენტს აცნობა, რომ კოალიციური მთავრობის ფორმირებაზე შეთანხმებას მიაღწია, - ინფორმაციას BBC-ი ავრცელებს.

„მე მოვახერხე [მთავრობის ფორმირება]“, - დაწერა ნეთანიაჰუმ „ტვიტერზე“, ისრაელის პრეზიდენტის, ისააკ ჰერცოგის მიერ მთავრობის ფორმირებისთვის დადგენილ ვადამდე რამდენიმე წუთით ადრე.

BBC წერს, რომ შეთანხმებული იქნა ახალი მთავრობა, რომელიც ისრაელის ისტორიაში ყველაზე მემარჯვენეა, რადგან ნეთანიაჰუს კოალიციაში რამდენიმე ულტრამემარჯვენე პარტია შედის.

ნეთანიაჰუ, რომელმაც ნოემბერში არჩევნებში გაიმარჯვა, პრემიერ-მინისტრის პოსტზე მეექვსე ვადით იმუშავებს.

პალესტინელები შიშობენ, რომ ახალი მთავრობა გააძლიერებს ისრაელის კონტროლს მდინარე იორდანეს დასავლეთ სანაპიროზე.