ერთადერთი, რასაც შეიძლება ნიკა მელიამ და ლევან ხაბეიშვილმა მიაღწიონ, ეს არის არჩევნების მოგება „ნაციონალურ მოძრაობაში“ - არავითარი სამოქალაქო დაპირისპირებისა და "მეორე ფრონტის" გაჩაღების რესურსი ამ ადამიანებს არ აქვთ, - ასე უპასუხა „ქართული ოცნების“ თავმჯდომარემ ირაკლი კობახიძემ ჟურნალისტების შეკითხვას, თუ რას ელის ოპოზიციისგან და „ნაციონალური მოძრაობის“ თავმჯდომარისგან ნიკა მელიასგან, რომელიც ამბობს, რომ კანონის ფარგლებში იმოქმედებს.

როგორც კობახიძემ აღნიშნა, რეალურად ოპოზიციას აქციის ჩატარების რესურსი არ აქვს.

„ახლა არიან კონცენტრირებული ვადამდელ არჩევნებზე, რომელიც ტარდება „ნაციონალურ მოძრაობაში“. ალბათ, გააგრძელებენ შოუების დადგმას იმისთვის, რომ ერთმა და მეორე მხარემ მოიპოვოს უპირატესობა შიდაპარტიულ კონკურენციაში. არავითარი სამოქალაქო დაპირისპირებისა და "მეორე ფრონტის" გაჩაღების რესურსი ამ ადამიანებს არ აქვთ. ამ მიზანს ვერ მიაღწევენ. ამის დიდი სურვილი აქვთ, მაგრამ ეს არის მათთვის მიუღწეველი მიზანი. ერთადერთი, რასაც შეიძლება მელიამ და ხაბეიშვილმა მიაღწიონ, ეს არის არჩევნების მოგება „ნაციონალურ მოძრაობაში“. თავიდან ბოლომდე ყველა მათი განცხადება არის განკუთვნილი შიდაპარტიული მოხმარებისთვის, იმისთვის, რომ მოიპოვონ საკუთარი რადიკალური აქტივის წევრების მხარდაჭერა, ამიტომ კონკურენციაში შედიან ამ ფორმით ერთმანეთთან. ყველა ცდილობს მაქსიმალურად რადიკალური განცხადებით გამოვიდეს. ამით, პირველ რიგში, ისინი იწვევენ ნიჰილიზმს „ნაციონალური მოძრაობის“ შიგნით, იმიტომ, რომ უკვე მეათედ ჰპირდებიან სამოქალაქო დაპირისპირებას, ხელისუფლების დამხობას, ათას უბედურებას და ვერც ერთხელ ვერ შეასრულეს ეს დაპირება. აქედან გამომდინარე, არ მგონია, რომ მათ რაიმე მოგება მოუტანოს ასეთმა რადიკალურმა განცხადებამ“, - განაცხადა კობახიძემ.