ადამიანის უფლებათა დაცვის კომიტეტის თავმჯდომარე მიხეილ სარჯველაძე „ნაციონალური მოძრაობის“ დეპუტატის დავით კირკიტაძის მიერ შიმშილობის შეწყვეტას მიესალმება, ანა წითლიძესა და თემურ ჯანაშიას კი მის შეწყვეტას სთხოვს. ამის შესახებ მან ჟურნალისტებს განუცხადა.

„გამიხარდა ამ გადაწყვეტილების მიღება. არა იმიტომ, რომ მე ასე მაწყობს, არამედ ადამიანური თვალსაზრისით მხოლოდ. იმიტომ გამიხარდა, რომ უბრალოდ თითოეული ადამიანის ჯანმრთელობა გასაფრთხილებელია. ბუნებრივია, ჯანმრთელობის დაზიანებისთვის და მოვლენების ასე განვითარებისთვის არავინ მემეტება. შესაბამისად, კარგი გადაწყვეტილებაა. რაც შეეხება დარჩენილ ორ დეპუტატს, ანა წითლიძესა და თემურ ჯანაშიას, მათაც მოვუწოდებ... რამდენად იქნება ეს გადამწყვეტი, ვერ გეტყვით, მაგრამ ნამდვილად მოვუწოდებ მხოლოდ ჰუმანიტარული მოტივებიდან გამომდინარე. საკუთრივ პროტესტი, ნამდვილად არაა ისეთი რამ, რომელიც შეიძლება ხელისუფლებას რაღაც თვალსაზრისით სერიოზულ დისკომფორტს უქმნიდეს, იმიტომ, რომ მოთხოვნა რომლის ირგვლივაცაა ეს პროტესტის ფორმა გამოყენებული, არ მგონია, რომ ასე შეიძლება ამ საკითხების დაყენება“, - განაცხადა სარჯველაძემ.

ცნობისთვის, ჯანმრთელობის მდგომარეობის გაუარესების გამო, „ნაციონალური მოძრაობის“ დეპუტატმა დავით კირკიტაძემ შიმშილობა შეწყვიტა. დავით კირკიტაძის ჯანმრთელობის მდგომარეობა კლინიკაში გადაყვანის შემდეგ სტაბილურია. ამ დროისთვის, პარლამენტში ყოფილი პრეზიდენტის, მიხეილ სააკაშვილის სამკურნალოდ საზღვარგარეთ გადაყვანის მოთხოვნით, „ნაციონალური მოძრაობის“ ორი დეპუტატი ანი წითლიძე და თემურ ჯანაშია შიმშილობს.