საქართველოს მესამე პრეზიდენტის ადვოკატის, შალვა ხაჭაპურიძის თქმით, ის საქალაქო სასამართლოს ჩააბარებს განცხადებას, რომელშიც აღნიშნავს, რომ მიხეილ სააკაშვილის ჯანმრთელობის მდგომარეობა მძიმეა და სასამართლო პროცესი უნდა დაჩქარდეს.

როგორც შალვა ხაჭაპურიძემ ჟურნალისტებთან აღნიშნა, მიხეილ სააკაშვილის თქმით, ის ცუდადაა და სასამართლო პროცესზე ჩართვა ვეღარ გააგრძელა.

„მიხეილ სააკაშვილი გუშინდელი პროცესით კმაყოფილია. ჩართვა ვეღარ გავაგრძელე, რადგან ძალიან ცუდად შევიქენიო. უკმაყოფილოა იმით, რომ პროცესი 29-ში გადაიდო. თქვა, რომ მისი ჯანმრთელობის მდგომარეობა ამდენს ვეღარ გაუძლებს და იქნებ რაიმე ზომები მიიღონ. ახლა მივდივარ საქალაქო სასამართლოში და ჩავაბარებ განცხადებას, სადაც აღვნიშნავ, რომ მისი ჯანმრთელობის მდგომარეობა უკიდურესად მძიმეა და სასამართლო პროცესი უნდა დაჩქარდეს“, - განაცხადა შალვა ხაჭაპურიძემ.