„სტრატეგია აღმაშენებელი“ ინიციატივით გამოდის, უკრაინაში მებრძოლ ქართველთა სტატუსი საქართველოს ტერიტორიული მთლიანობისთვის მებრძოლის სტატუსს გაუთანაბრდეს
ჩვენ მოვამზადეთ კანონპროექტი, რომლის მიზანია, საქართველოს იმ მოქალაქეების სტატუსი, რომლებიც მონაწილეობენ უკრაინის ტერიტორიული მთლიანობისთვის ბრძოლაში, გაუთანაბრდეს საქართველოს ტერიტორიული მთლიანობისთვის მებრძოლის სტატუსს და მათთვის და მათი ოჯახებისთვის შეიქმნას გარკვეული სამართლებრივი და სოციალური დაცვის გარანტიები საქართველოში, - ამის შესახებ „სტრატეგია აღმაშენებლის” მიერ გავრცელებულ განცხადებაშია აღნიშნული.
როგორც პარტიაში განმარტავენ, ამისთვის აუცილებელია, რომ „საქართველოს ტერიტორიული მთლიანობისთვის, თავისუფლებისა და დამოუკიდებლობისათვის დაღუპულ, უგზო-უკვლოდ დაკარგულ, მიღებული ჭრილობების შედეგად გარდაცვლილთა ოჯახების სოციალური დაცვის შესახებ" კანონით გათვალისწინებული დაცვის გარანტიები გავრცელდეს უკრაინაში მებრძოლ საქართველოს მოქალაქეებზეც.
„უნდა აღვნიშნოთ, რომ მსგავსი ინიციატივები ჰქონდათ ჩვენ სხვა კოლეგებსაც, რომელიც დაბლოკა "ქართულმა ოცნებამ" მაგრამ ვფიქრობ, ეს არის საკითხი რომელიც სცდება პოლიტიკურ კუთვნილებას და წარმოადგენს ეროვნულ უსაფრთხოებასთან დაკავშირებულ საკითხს.
ასევე, არანაკლებ მნიშვნელოვანია, რომ ქვეყანა უნდა ხედავდეს, აფასებდეს გმირობას, თავდადებას და ღირსეულ პატივს მიაგებდეს მას”, - ნათქვამია განცხადებაში.
