თქვენ მეგონეთ ღარიბაშვილზე და კობახიძეზე უკეთესი როგორც პოლიტიკოსი, მაგრამ ახლა შემიძლია გითხრათ, რომ არაფრით უკეთესი ირაკლი ღარიბაშვილზე და ირაკლი კობახიძეზე არ ხართ, - ასე მიმართა „ლელოს“ წევრმა საბა ბუაძემ თბილისის მერს კახა კალაძეს, რომელიც საკრებულოში დედაქალაქის ბიუჯეტის პროექტს წარადგენს.

ბუაძის შეფასებით, კახა კალაძეს დაპირებების ვერშესრულება, წარუმატებელი მმართველობის შედეგია.

„სამწუხაროდ, თქვენ უკვე დაიწყეთ პოლიტიკური მემკვიდრეობის გამოჭედვა. მე, როდესაც ამ მოწვევის საკრებულოს წევრი გავხდი, თქვენ მეგონეთ ღარიბაშვილზე და კობახიძეზე უკეთესი, როგორც პოლიტიკოსი, მაგრამ ახლა შემიძლია გითხრათ, რომ არაფრით უკეთესი ირაკლი ღარიბაშვილზე და ირაკლი კობახიძეზე არ ხართ. თქვენთვის, შეიძლება, ეს კომპლიმენტი იყოს, მაგრამ ჩემი აზრით, გამგები გაიგებს რაზე მაქვს საუბარი. რაც შეეხება შეუსრულებელ დაპირებებს, მინდა გაგახსენოთ მეტროსადგურების რეაბილიტაცია. მინდა შეგახსენოთ, 200 18-მეტრიანი ავტობუსი და ასევე, მინდა ხაზი გავუსვა თქვენ უარი თქვით ჩვენი საერთაშორისო პარტნიორების მხრიდან თბილისისთვის შემოთავაზებულ ძალიან შეღავათიან სასესხო ხელშეკრულებაზე, რითაც თბილისელებს დააკარგვინეთ ძალიან ბევრი ფული, რომელიც შეიძლებოდა გამოყენებული ყოფილიყო უამრავი მნიშვნელოვანი პროექტის განხორციელებაში. ყველა მიმართულებით თქვენ გაქვთ შეუსრულებელი დაპირებები და პრობლემები. ეს არის წარუმატებელი მმართველობა და წარუმატებლობას აქვს თავისი ახსნა - ეს არის კორუფცია, უცოდინრობა და გადამწყვეტ მომენტში ისტორიის არასწორ მხარეს ყოფნა", - მიმართა ბუაძემ საკრებულოს სხდომაზე კახა კალაძეს.