ვატიკანში, წმინდა პეტრეს ბაზილიკაში დასვენებული ემერიტუსი პაპის, ბენედიქტ XVI-ის ხსოვნისთვის პატივის მისაგებად ათასობით კათოლიკე რიგში დგას.
როგორც მედია წერს, ზოგიერთი მორწმუნე იმედოვნებს, რომ ყოფილ პაპს წმინდანად შერაცხავენ.
ოფიციალური პირები ვარაუდობენ, რომ ვატიკანს დღეში სულ მცირე 35,000 ადამიანი ეწვევა, რათა პატივი მიაგონ ბენედიქტ XVI-ის ხსოვნას.
წმინდა პეტრეს ბაზილიკაში, საკურთხევლის წინ დასვენებულ ყოფილ პონტიფიკოსს პატივი უკვე მიაგო იტალიის პრეზიდენტმა სერჯო მატარელამ და პრემიერ-მინისტრმა ჯორჯია მელონიმ.
შეგახსენებთ, ბენედიქტ XVI შაბათს, 31 დეკემბერს, 95 წლის ასაკში გარდაიცვალა. მისი ცხედარი ვატიკანის მონასტრიდან დღეს დილის 7 საათზე წმინდა პეტრეს ბაზილიკაში გადაასვენეს, სადაც ის სამი დღით იქნება დასვენებული. ყოფილ პონტიფიკოსს ხუთშაბათს დაკრძალავენ. მესას პაპი ფრანცისკე აღავლენს.
ბენედიქტ XVI კათოლიკური ეკლესიის წინამძღოლი 2005 წლიდან იყო. 2013 წელს ის პირველი რომის პაპი გახდა ბოლო 600 წლის განმავლობაში, რომელიც წმ. პეტრეს კათედრიდან გადადგა.