საქართველოს ტექნიკური უნივერსიტეტის რექტორი, პროფესორი დავით გურგენიძე სრულიად საქართველოს კათოლიკოს-პატრიარქს, მცხეთა-თბილისის მთავარეპისკოპოსს და ბიჭვინთისა და ცხუმ-აფხაზეთის მიტროპოლიტს, უწმინდესსა და უნეტერესს ილია მეორეს საქართველოს ტექნიკური უნივერსიტეტის სახელით 90 წლის იუბილეს ულოცავს.

როგორც მილოცვაშია ნათქვამი, პატრიარქი მაგალითია იმისა, როგორი უნდა ვიყოთ თითოეული ჩვენთაგანი.

„თქვენო უწმინდესობავ, ჩვენი ერის სულიერ წინამძღოლს, საქართველოს ტექნიკური უნივერსიტეტის სტუდენტების, პროფესორ-მასწავლებლების და ადმინისტრაციის თანამშრომლების სახელით, ვულოცავ დაბადების დღეს.

თქვენ მაგალითს გვაძლევთ გავხდეთ უკეთესნი, წრფელი სიყვარულით გვიყვარდეს სამშობლო და ერთმანეთი. თქვენ ხართ თავმდაბლობის, სულგრძელობის, მოთმინების, სიკეთისა და მიმტევებლობის მაგალითი. მაგალითი იმისა, როგორი უნდა ვიყოთ თითოეული ჩვენთაგანი. დიდი მადლობა თქვენ სიყვარულისა და ზრუნვისთვის.

გილოცავთ! მრავალჟამიერ თქვენ! პატივისცემითა და საუკეთესო სურვილებით,

დავით გურგენიძე,

საქართველოს ტექნიკური უნივერსიტეტის რექტორი”,- აღნიშნულია მილოცვაში.