სპეციალური პენიტენციური სამსახურის წარმომადგენელი ნიკა აბრამიშვილი ამტკიცებს, რომ საქართველოს მესამე პრეზიდენტის მიხეილ სააკაშვილის თმისა და ფრჩხილის აღებული ნიმუშები ლაბორატორიაში ანალიზის გაკეთებისას არ იყო დალუქული. ამის შესახებ მან სასამართლო სხდომაზე განაცხადა.
თავის მხრივ, ამერიკელი ექსპერტი და ნევროლოგი შახინ ემანუელ ლაჰანი კი აცხადებს, რომ ნიმუშები დალუქული იყო.
„თმისა და ფრჩხილის ნიმუშის აღებას არამხოლოდ ვესწრებოდი, არამედ თავად ავიღე ეს ნიმუშები. მე ვიხელმძღვანელე იმ ლაბორატორიის მიერ მოწოდებული პროცედურით, სადაც უნდა გაკეთებულიყო ანალიზი და ასევე სასამართლო სამედიცინო ექსპერტიზის პრინციპებით. ეს არის ენემესის ლაბორატორიის მიერ მოწოდებული პროტოკოლი. აღებული ნიმუში დაილუქა. მე შესაბამისად დავადოკუმენტირე ეს დალუქული ნიმუშები. მე ვასრულებდი და ვაკვირდებოდი ასევე ბიოფსიის პროცედურას, გადავუღე ფოტოები დალუქულ ნიმუშებს. საერთაშორისო გადაზიდვების კომპანიაში იყო ექსკორტირებული ეს ნიმუშები. გადაზიდვების კომპანიაში უშუალოდ მე მივიტანე ეს ნიმუშები,“- განაცხადა შახინ ემანუელ ლაჰანიმ.
როგორც პროცესზე მიხეილ სააკაშვილის ადვოკატმა შალვა ხაჭაპურიძემ აღნიშნულ საკითხთან დაკავშირებით განმარტა, დოკუმენტში ჩანაწერი ლუქის არქონასთან დაკავშირებით მას შემდეგაა გაკეთებული, რაც ლაბორატორიამ ნიმუში გახსნა და მისი ანალიზის გაკეთება დაიწყო.