მიუხედავად იმისა, რომ „ქართული ოცნების“ ბევრი წევრი ისევე როგორც მე, „ნაციონალური მოძრაობის" არჩევნებში ლევან ხაბეიშვილის კანდიდატურას ვემხრობით, ამ ჩანაწერთან არავითარი კავშირი არ გვაქვს, - ამის შესახებ საპარლამენტო უმრავლესობის წევრმა ბექა დავითულიანმა განაცხადა.

მისი თქმით, ჩანაწერების გაკეთება და გავრცელება „ნაციონალური მოძრაობის" ხელწერაა.

„ბრალს გვდებენ, რომ ამ ჩანაწერთან ხელისუფლებას აქვს კავშირი, მიუხედავად იმისა, რომ „ქართული ოცნების" ბევრი წევრი ისევე, როგორც მე, "ნაციონალური მოძრაობის" არჩევნებში ვემხრობით ლევან ხაბეიშვილის კანდიდატურას, ამ ჩანაწერთან არავითარი კავშირი არ გვაქვს. ეს არის „ნაციონალური მოძრაობის" ხელწერა, თვითონ „ნაციონალური მოძრაობის" წევრები გამოვიდნენ და პირდაპირ დაადეს ხელი ვანო მერაბიშვილს, რომ ეს მისი გავრცელებული ჩანაწერია. ისინი როგორც მთელ ქვეყანას იწერდნენ თავის დროზე, როცა ხელისუფლებაში იყვნენ, დღეს საკუთარი პარტიის წევრებს იწერენ, უქვეყნებენ, აშანტაჟებენ და ა.შ. ჩვენ ვიცით რომ „ნაციონალურ მოძრაობაში" საქმე კარგად არ მიდის, რაც ნიშნავს იმას, რომ ქვეყანაში შეიძლება საქმე უკეთესად წავიდეს. ჩვენ დიდი ინტერესი ამ პროცესის მიმართ არ გაგვაჩნია,"- განაცხადა დავითულიანმა.

ცნობისთვის, სოციალურ ქსელში ჩანაწერი ვრცელდება, რომლის ავთენტურობაც დადასტურებული არ არის. გავრცელებული ჩანაწერების თანახმად, "ნაციონალური მოძრაობის" თავმჯდომარე ნიკა მელია მიხეილ სააკაშვილს უცენზურო სიტყვებით მოიხსენიებს.