სლოვენიელი სპეციალისტები სკრინინგ ცენტრის ექიმებისთვის ძუძუს კიბოს სკრინინგის ტრენინგს ატარებენ

ატომური ენერგიის საერთაშორისო სააგენტოს ორგანიზებით, ეროვნული სკრინინგ ცენტრის სამედიცინო და ადმინისტრაციული პერსონალისთვის ძუძუს კიბოს სკრინინგის მულტიდისციპლინური კურსი ტარდება. ამის შესახებ ინფორმაციას თბილისის მერია ავრცელებს.

მათივე ცნობით, სკრინინგ ცენტრის თანამშრომლები სლოვენიელი ექსპერტებისგან, როგორც თეორიულ, ისე პრაქტიკულ ცოდნას მიიღებენ, რომლის მიზანი აღნიშნული მიმართულებით, თანამედროვე, ევროპული სტანდარტებისა და გამოცდილების გაზიარება, მისი შესაბამისობა არსებულ გამოცდილებასთან და პროფესიული ცოდნის ამაღლებაა.

„ტრენინგზე ძირითადი აქცენტები კეთდება სლოვენიაში არსებულ ძუძუს კიბოს სკრინინგის მოდელზე, პროგრამის მოწყობაზე, მართვასა და ადმინისტრირებაზე.

კურსის ფარგლებში, სხვა საკითხებთან ერთად, ძუძუს კიბოს ორგანიზებული სკრინინგის მოდელის, ხარისხის კონტროლის, შეფასებისა და მონიტორინგის სისტემის, ინფორმაციული ტექნოლოგიების, ფსიქოლოგიური ასპექტების, ქალებსა და სხვა დაინტერესებულ პირებთან კომუნიკაციის შესახებ იმსჯელებენ.

სატრენინგო კურსს სლოვენიაში ძუძუს კიბოს სკრინინგის პროგრამის ხელმძღვანელი და წამყვანი რადიოლოგი, მედიცინის დოქტორი ქრისტინა ჰერტლი, ძუძუს კიბოს სკრინინგის პროგრამის ხელმძღვანელის მოადგილე, რადიოლოგი, მედიცინის დოქტორი მილოშ ვროვეჩი, რადიოგრაფერი, ძუძუს პოზიციონირებისა და ხარისხის კონტროლის ტრენერი ვერონიკა კუტნარი, სამედიცინო ფიზიკოსი ურბან ჟდესარი და ძუძუს კიბოს სკრინინგის პროგრამის პროექტების მენეჯერი, ექსპერტი მატეა კურირი ატარებენ.

ტრენინგის გახსნაზე მონაწილეებს სიტყვით მიმართეს ეროვნული სკრინინგ ცენტრის დირექტორმა, ეთერ კიღურაძემ და ქრისტინა ჰერტლიმ. გამომსვლელებმა სკრინინგის პროგრამის მნიშვნელობაზე, განვითარების პერსპექტივებსა და ამ მხრივ, ევროპული, კერძოდ, სლოვენიის გამოცდილების გაზიარების მნიშვნელობაზე გაამახვილეს ყურადღება. ასევე, ცენტრის მუშაობის სპეციფიკაზე, საქართველოში ძუძუს კიბოს სკრინინგის პროგრამის თავისებურებებზე, ცენტრში არსებულ ხარისხის კონტროლზე, არსებულ გამოწვევებსა და სამომავლო გეგმებზე ისაუბრეს.

სლოვენიელმა სტუმრებმა ეროვნულ სკრინინგ ცენტრთან თანამშრომლობის გაღრმავების პერსპექტივები განიხილეს და თანამედროვე მეთოდების, პრაქტიკისა და ინოვაციური მიდგომების ურთიერთგაზიარების თვალსაზრისით ერთმანეთს მხარდაჭერა აღუთქვეს“, - აღნიშნულია ინფორმაციაში.

სლოვენიის ძუძუს კიბოს სკრინინგის ხელმძღვანელის განცხადებით, ბევრი რამ უკეთესობისკენ არის შეცვლილი.

„მოხარული ვართ, რომ საქართველოში კვლავ ვიმყოფებით. ბევრი რამ უკეთესობისკენ არის შეცვლილი. აქ ვართ, რათა გაგიზიაროთ ჩვენი პროგრამის გამოცდილება, რომელიც 2008 წლიდან მიმდინარეობს. ვიმედოვნებთ, რომ ეს შეხვედრაც ნაყოფიერი იქნება“, - განაცხადა ქრისტინა ჰერტლიმ.

დედაქალაქის მერიის ცნობით, კურსის ფარგლებში, სლოვენიელი სტუმრები ეროვნული სკრინინგ ცენტრის ყველა ფილიალს დაათვალიერებენ, ადგილზე გაეცნობიან ახალი თაობის მამოგრაფების მუშაობას და შესაბამის რეკომენდაციებს მოამზადებენ.

ზურაბ ბატიაშვილი - დასავლეთში მიღებულია გადაწყვეტილება, რომ ამ ომში უკრაინამ უნდა გაიმარჯვოს და ეს 2023 წელს მოხდება
ქართული პრესის მიმოხილვა 26.01.2023
ფარხად მამედოვი - აზერბაიჯან-სომხეთის მოლაპარაკებები შეიძლება შედგეს თბილისში, მაგრამ იმ შემთხვევაში, თუ ძირითადი მოდერატორი ამერიკა იქნება და არა ევროკავშირი
ხელოვნური ინტელექტი და სწავლების მეთოდები - BTU მასშტაბურ კვლევას იწყებს
ქართული ბიზნესკომპანიები უკრაინის მხარდაჭერას განაგრძობენ
Glovo და TNET საქართველოში ახალ ტექნოლოგიურ რეალობას ქმნიან
ხელოვნური ინტელექტის ინოვაციური პროდუქტის ChatGPT-ს შესახებ BTU-ში დისკუსია გაიმართა
Wolt საქართველოს მომხმარებელთა მხარდაჭერის გუნდი მალე გერმანიასაც მოემსახურება
“ლიბერთი” განათლების ხელშეწყობას აგრძელებს
წიგნი, რომელიც ხელოვნური ინტელექტის მიერ დაიწერა BTU-ში წარადგინეს