დიდი ბრიტანეთი უკრაინისადმი ტანკების გადაცემის შესახებ ოფიციალურ განცხადებას ორშაბათს გააკეთებს. ინფორმაციას ამის შესახებ ბრიტანული გამოცემა The Guardian უკრაინულ წყაროებზე დაყრდნობით ავრცელებს.

გამოცემის თანახმად, მისმა უკრაინულმა წყაროებმა აღნიშნეს, რომ შემდეგ პარასკევს დასავლეთის თავდაცვის მინისტრების დაგეგმილი შეხვედრის ფონზე დადებითი გადაწყვეტილება დიდი ბრიტანეთის მიერ უკვე მიღებულია, ხოლო ფორმალური განცხადება ორშაბათს არის მოსალოდნელი.

The Guardian-ის წყაროების თანახმად, საუბარი კიევისთვის დაახლოებით 10 Challenger 2 ტანკის გადაცემაზეა, რაც, მათი იმედით, დაეხმარება გერმანიას მისი Leopard 2 ტანკების უკრაინისთვის რეექსპორტირების უფლება გასცეს.

აქამდე ცნობილი გახდა, რომ კიევის მხრიდან მრავალთვიანი თხოვნების შემდეგ დიდი ბრიტანეთი უკრაინისთვის ტანკების გადაცემის შესაძლებლობას განიხილავდა, თუმცა საბოლოო გადაწყვეტილება პრემიერ-მინისტრ რიში სუნაკზეა.