„ხალხის ძალის" განცხადება არის დადასტურება, რომ სააკაშვილის წინააღმდეგ სპეცოპერაცია მიმდინარეობს, - ამის შესახებ „სტრატეგია აღმაშენებლის" დეპუტატმა პაატა მანჯგალაძემ "ხალხის ძალის" განცხადების კომენტირებისას აღნიშნა.

მისი თქმით, რუსული სცენარია, როცა ადამიანის მკვლელობას დასავლეთს აბრალებენ.

„ჯერ თქვეს თვითდაზიანებას იყენებს, სუიციდისკენ აქვს მიდრეკილებაო, მერე თქვეს ღმერთის ნებაა, ჩვენ რა ვიცითო, ამ დროს გავიგეთ, რომ თურმე დარიშხანით არის მოწამლული. მერე თქვეს, ჩვენ კი არ მოვკლავთ, დასავლეთის სპეცსამსახურები გააკეთებენ, რადგან ბევრი ინფორმაცია აქვს სააკაშვილსო. ეს არის რუსული სცენარი, რომ მოკლან ადამიანი და დააბრალონ სხვას. ჰქონდათ სცენარი თავად სააკაშვილისთვის დაებრალებინათ, მერე ღმერთის ნებისთვის უნდოდათ დაბრალება და ახლა გადავიდნენ დასავლელი პარტნიორების დადანაშაულებაზე. ეს არის რუსული სპეცსამსახურების სცენარი და სამწუხაროა, რომ ამ სქემის მონაწილეები არიან ესენი,"- განაცხადა მანჯგალაძემ.

ინფორმაციისთვის, „ხალხის ძალამ“ დღეს განცხადება გაავრცელა, რომელშიც აღნიშნავს, რომ „სააკაშვილის პატრონებს რჩებათ გეგმა B - მისი, როგორც ოქროს მოწმის მოშორება, სააკაშვილის სიკვდილის ხელისუფლებისთვის დაბრალება, ამ საბაბით კი ქვეყანაში მასობრივი არეულობის მოწყობა“.